Mas di 280 compania a registra na e Encuentro Virtual di comercio entre Aruba y Venezuela

Ministro Geoffrey Wever

ORANJESTAD (AAN): Siman pasa a tuma luga Virtual Business Matchmaking na Camara di Comercio, y tambe virtualmente via Zoom. Durante henter un  dia di trabao empresarionan di Venezuela por a conecta cu empresarionan di Aruba den un setting único y nobo pa esnan na Venezuela como tambe esnan di Aruba. E interes tabata grandi, di ambos pais.

   Na ultimo momento ainda a ricibi mas registracionnan, cual a sobrepasa 230 registracion di parti di Venezuela, y mas di 70 di parti di Aruba.

  Durante e evento tabata diferente sector comercial Venezolano a presente diferente oferta di producto of servicio y tambe den ki frecuencia nan ta obtenibel y tambe e calidad.

  A enfoca riba 9 sector, esta: Turismo, Pesca, Construccion, Inmobilaria, Petrolero, Tursimo di Salud, Tecnologia, Agroindustria y Salud/Bienestar. Por raporta cu ya caba a demostra di tin interes grandi di parti di comercio pa haci negoshi cu otro. Por a mira esaki den e cantidad di compania cu a registra y atende e Virtual Business Matchmaking, y kende nan awo ta den contact cu otro.

   Minister Wever ta mira espacio pa awo stimula y facilita hacimento di negoshi entre comercio di Aruba y comercio Venezuela ya cu esaki ta na beneficio di e consumidor cu posiblemente por beneficia di miho prijs, of mas variacion y obtenibilidad di producto.

   Banda di oportunidad pa comercio, e obstaculonan cu lo mester atende cune pa por facilita e comercio entre nos dos paisnan tambe a worde presenta. Combersacionnan al caso y interesante cu a inicia durante e sesion. Minister Wever tin como prioridad pa mehora lasonan comercial cu nos paisnan bisiña pa asina por tin mas oferta di producto y servicio, y posiblemente na miho prijs pa e ciudadano. Por spera cooperacion y comunicacion  y intensificacion di e esfuersonan den e temporada nos dilanti pa por facilita mas aun e comercio entre Aruba y Venezuela.