Tocante e suicidio di un menor na warda di Shaba:
ORANJESTAD (AAN) – Minister di Husticia y Asunto Social, a haya un peticion di tres parlamentario, pa un reunion publico relaciona cu e sucedido lamentable na warda di Shaba, cu a perde su bida despues di a comete suicidio.
“Nan a pidi, en todo caso, pa presenta e maneho, e protocol, y e procesonan cu tin pa cu esaki. Generalmente, mi ta bin cu un consehero, pero awe mi a bin cu full e veld social y hudicial, pa e parlamentarionan tambe wak cu trabao grandi ta wordo haci, y cu e personanan aki den veld, ta tuma nan trabao hopi na serio”, e dignatario a expresa.
Minister Tjon a indica cu e lo duna e parlamentarionan e instruccionnan di trabao di Procurador General, cu ta data di aña 2001, unda cu literalmente ta skirbi cu tur caso unda un persona perde su bida na warda di polis of na KIA, un investigacion extenso ta wordo conduci door di Landsrecherche.
“Pero tambe nos lo duna nan e Korps Order di Arestanten verzorgen di Cuerpo Policial, caminda tambe nan por wak tur e diferente facetanan door di documentonan di alrededor di 30 pagina, unda ta papia di clasificacion di e diferente arestantenan, con e maneho ta pa cada arestante, kico ta e maatregelen cu ta wordo tuma pa preveni cu casonan lamentable sosode, y na mesun momento mi ta duna nan e beleids nota pa loke ta nos Instituto Coreccional, unda ta wak e maneho cu ta wordo implementa, pa evita tur tipo di suicidio tuma lugar den e Instituto Coreccional”, e dignatario a señala.
Pues, el a reitera cu e lo duna e parlamentarionan concerni tur e documentonan y e ta para habri pa cualkier pregunta cu nan lo por tin.
Na un pregunta tocante cu persona suicida ta un menor di edad, cu no ta suppose di ta den un warda di polis ni den KIA, kico ta e proceso, e mandatario a contesta:
“Bo kier evita cu menornan di edad tambe ta wordo cera, pero segun ley, menornan di edad cu ta comete actonan criminal, tambe mester wordo cera y nos no conoce un sistema diferente.
Pero den tur e documentonan cu nos a mustra nan awe, ora ta trata di menornan specificamente, tambe tin un maneho specifico cu tambe ta wordo hiba, depende di e casonan. P’esey ta importante tambe mirando cu nos a wordo georder, entre otro door di CPT, nos mester tin e maneho aki ‘in place’, y nos tin’e. Esey mi lo mustra nan tambe”, Minister Rocco Tjon a señala.
