Luna di October ta luna di concientizacion riba uso di garoti door di personanan cu limitacion visual

Sary Wernet di FAVI:

ORANJESTAD (AAN) – Manera ta conoci Luna di October ta Luna di Concientizacion riba vision. Sary Wernet, di Fundacion FAVI, a menciona den entrevista cu DIARIO, cu tur hende sa cu FAVI ta activo for di September caba, na unda nan ta bay cu nan clientenan activo, cruza caya y haci demostracion di e uso di nan garoti.

            “Nos garoti ta un simbolo internacional unda cu FAVI ta sostene nos clientenan cu tin un limitacion visual, door di sali cu nan, entrena nan cu uso di garoti, pero tambe e comunidad; entre otro, e automobilistanan pa tene cuenta cu personanan cu limitacion visual, den trafico”, Sary Wernet a bisa.

            El a agrega cu e ta haya remarca den comunidad, cu no ta mira hende cu garoti riba caminda, locual ta corecto pero e tin di haber cu cultura. Si wak e cultura di awo compara cu antes, bo no ta wak hopi peaton riba caminda, pues awendia no ta wak hopi persona ta frecuenta riba caya, vooral persona cu limitacion visual.

            “Esey no kiermen cu nos tin cu stop di haci loke nos ta haci. Nos tin cu continua pasobra mundo tambe por cambia y den futuro nos por wak atrobe hopi hende riba caya. Y nos no por keda sin concientiza y siña nos hendenan con ta uza e garoti den trafico. Pero alavez tambe pa concientiza e automobilista, e ciclista, esun cu ta core bromer riba e importancia di e velocidad, pa duna chens a cruza vooral den e rotondenan”, Sary Wernet a subraya.

            El a agrega cu FAVI tabata tin algun accion e siman aki, na rotonde di Ponton, unda por a wak cu tin automobilista ta compronde y ta slow down, pero den otro areanan mas habri por ripara cu automobilistanan no sa con pa reacciona, y ta sigui core. Pues eynan ta duna e señal cu speed ta hunga un rol, Wernet a subraya.

            El a agrega cu nan ta haciendo demostracion cu gruponan chikito pa wak e atencion y ora nan ta acompaña pa polis si e automobilistanan ta para di biaha, pero nan kier wak kico ta pasa ora no tin Cuerpo Policial ni prensa, con e reaccion ta. “Esey ta importante, pasobra na final ta nos rol siña nos clientenan moviliza di punta A pa punta B, pero si no tin e confianza den comunidad, e ora ey nos no por yuda nan mucho tampoco” Sary Wernet a remarca.