Usuarionan tin cu warda hopi prome cu bus yega:
ORANJESTAD (AAN) — Manera tur diamars, Aruba ta yama bon bini na un crusero grandi, cu ta trece hopi turista y un grupo di nan ta aporta entrada na Arubus, pasobra merdia nan ta bay disfruta di beach y lama.
Banda di e turistanan aki semper tin e grupo di trahado cu ta drenta traha merdia, sea den e area di Smith Boulevard, den sector hotelero of den hospital, etc., cu tambe ta warda e bus di cual nan ta pasahero vast.
Diferente usuario ta puntra ta di con si ta algo bon conoci pa Arubus caba, nan no ta pone extra bus (extra servicio) Diamars, entre 11 cu 12’or (alomenos), y no cu cantidad di pasahero, local y bishitante tin cu warda hopi, prome cu un bus cu ta bay ruta di hotel ta yega na e terminal.
Diamars aki berdad no a yobe, ni por a mira solo su cara, pero esey no kiermen cu no tabata tin calor. Al contrario e temperatura tabata bochornoso y tur usuario tabata ansioso pa e bus yega pa caba! Con cu bay bin, tampoco tin facilidad pa usuarionan. Un bushalte cu nan a traha tin capacidad pa maximo seis hende, y no ta mucho funcional cu por bisa. Si awacero ta cay, tur hende tin cu core wak unda ta scapa di muha, pasobra bao di e dak ey, tur hende ta muha mescos cu si no tin.
No solamente e turistanan cu ta bin den avion y ta keda Aruba sea un par di dia of henter un siman of mas, ta importante. Esnan cu ta bin den crusero y ta keda un par di ora tambe ta turista importante, mescos e hende local cu casualmente ta cuminza traha na e mesun ora cu e terminal ta yena cu turista cu ta pasahero tambe di Arubus.
Riba potret por mira un parti so di e pasaheronan na spera di bus, mas pariba banda di e loket di benta di carchi di Arubus, tabata tin otro cantidad di usuario wardando bus.
Ohala Arubus por ta mas diligente y cuminza structura miho di manera cu Diamars no tin mas un grupo grandi di pasahero aglomera merdia, mientras tin tardanza di bus pa e ruta menciona
