Weekend di otro expo di arte di Yahaira Maduro  

“Apasionada” den Cas di Cultura ---ORANJESTAD (AAN): E fin di siman aki lo bay tin un exhibicion di arte completamente gratis na Cas di Cultura,

y e ta wordo yama ‘Apasionada Solo Art Exhibition’ cu ta presenta obranan di e artista local Yahaira Maduro.

   “Apasionada” ta bira e di dos exhibicion di arte di Yahaira.  Door di combina expresionismo abstracto y Pop Art den su obranan pa e exhibicion aki, e kier exalta diferente tipo di amor y pasion.  Door di un viahe colorido di creatividad, e ta promove e estimulo di mente, curazon, y sentido di e persona cu ta mira nan, inspirando nan pa braza nan pasion, loke sea cu esaki por ta, y pa sigui nan curazon.

   Yahaira na December 2020 ya caba a tene e exhibicion ‘Joie de Vivre’ na Cas di Cultura.  Na April 2021 el a presenta su obranan na e exhibicion internacional di arte “Romantica” na M.A.D.S. Milano na Italia.  Na Juli 2021 el a exhibi na e Collective Art Show na Van Gogh Art Gallery na Madrid na Spaña.

   Recien na September 2021 el a exhibi na ‘Art3F Paris’ na International Contemporary Art Fair na Francia.

   DIARIO a compronde cu pa luna di Juni 2022, e lo ta participando na Monaco Contemporary Art Fair 2022 na Monaco.

   Diabierna anochi tabatin e apertura oficial, unda a anuncia cu e exhibicion aki ta dedica na su mama Lourdes Maduro-Albus, kende ta un muher di hopi talento.  E ta esun cu a promove e creatividad cerca Yahaira, y haya pasion pa arte.  Awe Diasabra 11 di December, publico por bay mira e exhibicion aki for di 6:30 pm te cu 10:30 pm.   Riba Diadomingo 12 di December, publico por mira e exhibicion aki for di 1:00 pm te cu 9:00 pm.  Entrada ta gratis.