Acto ceremonial di firma di “Gas Supply Agreement” entre gobierno y Eagle LNG a tuma lugar

Momento historico pa Aruba: --- ORANJESTAD (AAN) – Gobierno a yama un conferencia di prensa Diahuebs mainta den cuadro di e acto ceremonial di e firmamento di acuerdo entre Gobierno di Aruba NV y e compania Eagle LNG.

            E ceremonia aki a tuma lugar na Nicolas Store den e distrito San Nicolas.

            Minister di Labor, Energia y Integracion, a hiba palabra, y a yama bon bini na miembronan di Parlamento, su coleganan Minister, representante di Departamento di Estado di Merca, e Consul Interino di Merca instala na Curacao, representantenan di Eagle LNG, di WEB Aruba NV, San Nicolas Business Association, y miembronan di prensa, y el a keda sumamente contento y gradici cu nan presencia.

            “Pa nos esaki ta un momento historico y mi ta kere cu ora bo weita e caminda largo cu a wordo cana, den henter e esfuerzonan di diferente gobierno, a introduci un energia mas limpi pa Aruba, unda cu finalmente e dia a yega unda cu e ehecucion di e proyecto aki a firma un “Gas supply agreement” entre Eagle LNG y WEB Aruba NV”, e dignatario a expresa.

            E mandatario a agrega cu RdA tambe tabata presente pa cuminza e negociacionnan, tocante e lugar designa pa realiza e infrastructura di e facilidadnan aki, pa ricibi LNG y tambe pa distribui e pa WEB.

            “Di mi banda, como minister di energia, mi ta apoya e proyecto aki totalmente, mirando e historia di e diferente esfuerzonan cu a wordo haci den pasado. E proceso pa e refineria y industrianan alternativo a cuminza na 2019. Na e momento ey Minister Presidente tabata Minister di Energia unda cu e proceso a wordo cana caminda cu LNG, a sali e compania scogi, a base di cual nos ta na e momento historico aki”, e mandatario a señala.

            E mandatario a expresa su deseonan pa e compania orguyo di Aruba, WEB Aruba NV, pa nan diligencia, nan negociacion cu Eagle LNG cu a cuminza na Maart di e aña aki. El a felicita Eagle LNG pa su determinacion pa hunto yega na un acuerdo cu hunto ta un ganashi pa ambos partido.