Via e ayudo cu Hulanda a duna Aruba, e lasonan a bira mas fuerte

ORANJESTAD(AAN): Despues cu Secretario di Estado Raymond Knops a reuni cu Prome Minister Evelyn Wever Croes, el a hiba palabra durante di un conferencia di prensa Diaranzon atardi.

Knops a indica cu apesar cu tabata un bishita cortico, ultimo tempo e tabata tin hopi contacto cu e Prome Mandatario y cu esaki ta bay bek te cu casi 4 aña pasa.

“Mi kier a duna Prome Minister pabien cu e resultado di eleccion”.

“El a hiba un maneho di hopi curashi durante ultimo añanan, unda cu e no tabata encarga cu solamente duna bon noticia, sino e mester a haci tambe cosnan dificil pa bienestar di e pais”.

Tur esaki den un periodo durante di cual e crisis di COVID-19 a afecta nos tur grandemente, segun Knops.

E Secretario di Estado a sigui bisa cu e ta duna hopi respet y elogio pa esaki, pasobra no tabata facil.

“Nos a logra tene e relacion cu otro hopi bon si y si mi a siña un cos den mi periodo como Secretario di Estado ta cu e relacionnan den Reino di berdad ta relacionnan, unda cu bo por confia otro y bo sa kico e intencion ta”, segun Knops.

El a sigui bisa cu na final tur cos ta wordo haci na bienestar di e habitantenan di Aruba y Hulanda.

Segun e Secretario di Estado, esaki ta crea lasonan fuerte y cu el a gradici Wever Croes pa su aporte den e Rijksministerraad y e discusionnan cu nan a tene cu otro.

Knops a papia tambe di su bishita na Aruba Aloe, cu e ta haya un tremendo compania.

“Ta un compania di famia cu un historia largo, cu recientemente a ricibi un reconocimento Real recientemente”.

Bo ta wak y sinti e pasion di esnan cu ta traha pa e compania y mi ta kere cu esaki ta para como simbolo di locual ta pasando na Aruba, segun e Secretario di Estado.

El a uza Aruba Aloe como un ehempel di e hecho cu economia di Aruba ta recuperando, despues di hopi consecuencia negativo debi na e pandemia.

Knops sigui bisa cu via e ayudo cu Hulanda a duna Aruba den e temponan dificil , e lasonan a bira mas fuerte y bo ta wak kico esaki por nifica den temponan bon y den temponan malo si bo por yuda otro.

El a duna danki pa esaki tambe.