Awe 20 miembro di Parlamento ta huramenta - *Ora cu esaki bira posibel, Gobernador lo yam’e pa huramenta
ORANJESTAD (AAN): Awe 8 di juli pa 10’or di mainta, Gobernador di Aruba, Alfonso Boekhoudt lo huramenta miembronan di Parlamento recien elegi den e sala di reunion di Parlamento.
Diaranson Parlamento a analisa tur e geloofsbrieven di e personanan scogi como miembro di Parlamento. E analisis aki ta encera cu Parlamento ta mira si un miembro scogi ta cumpli cu e rekisitonan pa miembresia di Parlamento. Ademas un miembro no por tin un funcion extra cu ta den conflicto cu su miembresia di Parlamento.
Despues di verificacion di e cartanan credencial, Parlamento a dicidi diamars pa admiti tur 21 persona scogi, como miembro di Parlamento.
A base di e Kiesverordening, Gobernador ta convoca e miembronan di Parlamento aproba pa huramenta.
Awe 20 miembro di Parlamento a ricibi un invitacion por escrito di Gobernador pa huramenta awe 10’or di mainta. Tin un miembro di Parlamento cu Gobernador no a convoca ainda. E miembro di Parlamento aki actualmente ta den aresto temporal na Korrektie Instituut Aruba (KIA), cual ta pone cu na e momento aki e no por asumi su encargo den Parlamento.
Ora cu esaki bira posibel, Gobernador lo yam’e pa huramenta. Gobernador a informa e miembro di Parlamento en cuestion por escrito tocante esaki diaranson.
Areglo di estado ta prescribi cu Gobernador ta huramenta e miembronan di Parlamento. Residentenan di Aruba cu nacionalidad Hulandes di mas di 18 aña di edad, directamente ta scoge e miembronan di Parlamento.
Riba 25 di juni ultimo e residentenan a scoge e miembro cu actualmente ta den aresto temporal na KIA, haciendo uso di nan derecho di voto. Despues Parlamento a aprob’e como miembro.
