Proceso electoral ta conclui den e realidad di Aruba y monarquia constitucional - *Instancianan independiente di Estado di Derecho a conduci na un decision - *Gobernador a splica cu Miembro di Parlamento no por funciona for di prison
ORANJESTAD(AAN)—Na momento cu protesta politico di parti di AVP contra e desaroyo di e investigacion di Ministerio Publico den e caso Avestruz a parce di ta crea un caos y hasta tabata tin temor cu tension politico lo tranca e proceso democratico, e fundeshi legal di Aruba a presenta su mes na Pueblo di Aruba.
Durante e siman den cual pais Aruba lo mester a sacudi riba su basem e realidad di un Estado di Derecho a presenta su mes riba tur tereno pa bandona teoria y na forma practico mustra Aruba con su base legal, riba cual democracia ta basa, ta salvaguardia funcionamento legal di un pais.
Uzo di palabranan manera Trias Politica, democracia, constitucion, hopi bez ta tuma luga sin un profundisacion y hasta aceptacion con e Estado di Derecho ta funciona realmente y pakico mester lucha pa e mantene su balor.
E siman aki a cuminsa cu un tension tremendo pasobra tabata obvio cu si Gobernador a sigui e custumber pa nombra Evelyn Wever-Croes como Informador, Aruba lo a drenta un temporada sumamente serio cu a crea un caos na e pais, cu no por soporta mas problema.
Ta hustamente e base legal di Aruba a scapa e pais, manera a bini dilanti ora Gobernador Alfonso Boekhoudt a drenta historia cu un decision pa no nombra representante di mundo politico como informador pero pa scoge dos persona cu ta representativo pa e gobierno cu Aruba mester.
E proceso di formacion asina ta transcuri den trankilidad, mientras Aruba a cuminsa prepara pa saluda su miembronan nobo di Parlamento, e representacion gubernamental di Pueblo cu ta dicidi pa medio di eleccion riba su gobierno.
Tension na Aruba tabata aumenta na momento cu politica tabata parce di ta domina. Na e momento e Estado di Derecho a bini dilanti ora e Conseho Electoral a duna prueba cu eleccion a bay segun tur regla, cu e transparencia debido na poblacion y partidonan politico.
Ministerio Publico a sigui cu su parti y na prome luga a mustra cu e no ta actua contra e organo independiente Conseho Electoral ya cu no tin ningun indicacion cu nan no a cumpli cu loke ley ta bisa.
Aki pues e Orden di Ley, e Estado di Derecho, cu ta e base legal di Aruba a presenta su mes na Aruba cu ta funciona solamente a base di loke ley ta exigi.
Corte di Husticia a atende cu e caso cu AVP como partido politico, regla den leynan di Aruba, a presenta y a dicta sentencia cu e proceso electoral por continua.
Na Aruba un punto moral a bira si Benny Sevinger segun e base moral di e Arubiano, por representa Aruba den Parlamento di Aruba siendo cu e ta sospechoso di crimen.
Manera DIARIO a splica ningun ley ta stroba cu un sospechoso ta miembro di Parlamento. Benny Sevinger no a wordo condena pero ta den detencion preventivo, loke segun moral di e Arubiano no ta permiti pa e fungi como Miembro di Parlamento. Un sentimento moral cu AVP no ta comparti.
AVP a tene su mes na e hecho cu Huez mester condena Benny Sevinger, mientras awor Parlamento lo bay traha riba un ley cu no ta permiti sospechoso ta parti di Parlamento.
A parce cu legalmente nada por stroba Benny Sevinger di drenta Parlamento mientras e ta den Prison. Su credencialnan a wordo aproba den Parlamento y e proceso electoral lo a conclui awe, na momento cu Benny Sevinger lo a presta huramento dilanti Gobernador como represente di Rey, kende ta Hefe di Estado di Aruba.
Aruba tabata den un tension enorme y temor grandi ta existi pa hasta siguridad di Benny Sevinger ora e wordo permiti dor di Ministerio Publico pa bay huramenta.
Ayera Gobernador Boekhoudt a cera e circulo na momento cu el a invita e Miembronan di Parlamento pa presta nan huramento.
Sinembargo e no a invita Benny Sevinger y a mustra riba un punto sumamente importante, cu cerca conocedornan di e sistema legal di Aruba tabata presente.
Con Benny Sevinger por cumpli cu su trabou como Miembro di Parlamento for di prison? Trabou di Miembro di Parlamento no ta solamente atende reunionnan pero e mester por investiga documentonan, informa su mes continuamente di gobernacion, entre otro.
Pues a base di loke Orden di Ley, sin emocion, ta trece dilanti, awe Benny Sevinger no por presta huramento pero lo mester keda en espera di su salida di prison caminda e ta permanece den detencion preventivo den e aso Avrastruz.
Aruba a cumpli cu su base legal como un Estado di Derecho, un pais cu un Orden di Ley!
