Varios klas di Colegio Arubano mira den area di Linear Park tur disfraza

ORANJESTAD (AAN): Recientemente den e ultimo simannan prome cu vakantie,

e alumnonan di Ciclo-Basico di Colegio Arubano na Playa, a participa na un Scavenger Hunt cu a start na e scol mes den Vondellaan, y a finaliza na Linear Park.

   E klasnan a escoge un tema pa representa nan den e actividad aki, y varios alumno a yega tur disfraza na un manera formidabel.

   Den e Scavenger Hunt aki, nan a participa den diferente tarea dibertido y educacional, relaciona cu diferente vak cu nan ta haya na scol.  Canando banda di caminda, nan a mustra nan mihor disfraz, y tabata hala atencion di chauffeurnan e mainta aki coriendo den Vondellaan y Lloyd G. Smith Boulevard cu ta mira nan forma diferente.

   Docentenan tambe a participa na esaki, bisti na un forma diferente.  Na final e tabata un dia exitoso di teamwork, energia, y diberticion.