Un dia cu alumnonan a bay scol cu tur otro cos menos tas

ORANJESTAD (AAN): Den pasado DIARIO a mira esaki wordo haci na otro scolnan.  Siman pasa tabata turno di Maria College MAVO na Playa pa organiza algo similar.

   Esaki tabata e mision pa tur alumno riba e di dos dia di ‘WE-Connect’.

   E dia ey di scol, tanto alumno- y docentenan mester a laga nan tas regular keda na cas.  Y na su lugar, reemplaza e tas cu cualkier otro obheto cu por yuda nan carga nan buki, pen, schrift, calculator, etui, lunch, y mas den dje.

   Y e resultado tabata uno dibertido.  Alumnonan a yega cas cu baki di sushi, ice-jug, hemchi, caha di Amazon, reem di wiel di auto, baby stroller, caha di cereal, saco di sushi, caha di zapato, caha di Sony PlayStation, macuto, maleta carry-on pa viaha, haula di pone pushi aden, bahul, baki di paña, peluche, weya di 6 quart, pochi di mata, varios garoshi di supermarket, caha di TV di 55 inch, frame di fan di manda aire (bukinan den dje), tricycle pa mucha, cantidad di cusinchi (bukinan aden), estuche di guitara, y hasta 2 toter grandi di 55 galon di Serlimar.  Riba potret por mira algun di nan.