Van Putten Chiropractic Clinic ta concentra riba adultonan di edad grandi

ORANJESTAD (AAN) Chiropractor dr. Renato van Putten, despues cu a regresa Aruba back di Hulanda na 2015,

a establece su clinic na diferente localidad y, recientemente, el a muda pa LG Smith Boulevard, unda a habri su clinica nobo Chiropractic van Putten y Club Roy 50 plus.

   Un local na unda ta concentra riba nos poblacion di tercer edad. Jaqueline Van Putten (ruman muhe di renato) hunto cu Marisela Werleman ta encarga cu e proyecto aki , cu ya tin 5 aña ta funciona cu hopi exito. Asina e tin un empresa di participacion familiar, cu ta conta cu un clientela sumamente satisfecho, den crecimento, y hopi contento cu e servicio y cu su ubicacion actual.

   Van Putten ta un profesional cu ta sigui update su mes pa semper keda “al dia” den loke ta salud integral, cu ta clave den su profesion. Esaki ta rekeri di constante inversion. Na e clinica abo por wak diferente aparatonan moderno cu Dr, Van Putten ta uza pa substancia su tratamento, p’asina trece alivio y mehoracion na su pashentnan.

   Diferencia entre Fisioterapia y Chiropractic:

   Dr. van Putten a splica nos kico ta e diferencia entre Fisioterapia y Chiropractic. El a indica cu Fisioterapia ta enfoca mas tanto den rehabilitacion, movecion, y fortalece musculo y tehido cu ehercicio y aparatonan, pa recupera e funcion despues di un lesion (trauma).

   Chiropractic ta enfoca mas riba e columna y su relacion cu sistema nervioso, tanto via ahustacion manual pa alinea e articulacionnan, alivia dolor, cu enfasis riba e conexion entre lomba (columna vertebral), y e chiropractor ta uza diferente tecnica pa asina coregi e alineacion. Ta cuminsa door di analisis di postura y di movecion y con esaki ta afecta y causa condicionnan di dolor. Na clinica Van Putten  na prome luga prome cu haci un tratamento e pashent ta wordo analisa na unda preguntanan ta wordo haci referente su condicion y dolor.

   Despues di e intake aki e pashent ta pasa pa tuma un analisis thermografico (infrared imaging) pa asina detecta detecta miho na unda e causa di e condicion (dolor) ta. Cu e scan aki nos por waak claramente pa medio di diferencia di temperatura, na unda mas e columna y musculo ta afecta (cambio den color). Una bes cu determina unda y kico ta e posible causa ta di e dolor, ta formula un plan di tratamento.

   Mester remarca cu Chiropractic no ta djis un kraak y cla; nos ta mira esaki hopi riba TikTok, na unda ta ponebo kere cu mester los henter e curpa pa medio di kraakmento. Pa tin un miho resultado y duradero mester sigui un plan di tratamento cu en general ta rekeri por lo menos 6 sesion. Despues cu a fiha e plan, Dr. Van putten ta cuminsa door di pone e pashent riba un cama di awa termico pa 20 min , pa asina relaha e pashent y prepar’e pa e tratamento chiropractico.

   Den tratamento chiropractico tin diferente tecnica cu por wordo uza. Tin cu ta mas fuerte y otro mas sutil. Aki, na clinica chiropractic si ta bay tin mester mas intervencion, nan tin un therapista- masagista, yui di Dr. Van Putten cu ta percura pa medio di diferente tecnica pa suaviza e musculo y trece alivio. Una bes cu e pashent wordo trata pa Dr. Van Putten den mayoria di biaha e tratamento ta wordo yuda pa medio di traction.

   Esaki ta mesanan avansa cu ta pone e presion necesario y ta elimina dolornan y trece Alivio. Un parti masha interesante tambe, ta cu Dr. van Putten, despues di algun tratamento, ta recomenda ehercicionan cu ta importante pa mantene e curpa sano y den movecion.