Motor nobo y mas potente di RECIP transporta di Barcadera pa WEB

ORANJESTAD (AAN): Manera ta conoci, Aruba ya no ta uza sistema di boiler pa produci coriente y awa mas. 

Awor ta uzando motornan reciprocating (yama ‘RECIP”) cu ta hopi eficiente den combustibel, pa yuda spaar placa y produci mas coriente posibel.

   Na WEB Aruba NV ya tin varios di e motornan aki den servicio cu hunto cu Parke di Molina y e Parkenan di Panel Solar, ta yuda genera coriente pa Aruba.

   Como parti di proyecto ‘Expansion di Planta RECIP-3’, riba Dialuna 26 di januari a transporta un motor RECIP nobo for di waf na Barcadera pa tereno di WEB Aruba NV na Balashi.

   Ta trata di motor di marca Wärtsilä, cu ta un compania di Finlandia cu ta sigui moderniza cada motor pa haci nan aun mas eficiente.  Prueba di esey ta esun nobo aki cu a caba di yega Aruba, cu ta produci mucho mas coriente compara cu esnan existente.

   E motor aki ta hopi pisa, y pa e move di Waf di Barcadera te na Balashi, mester a busca permiso di e.o Polis, pa cera caminda di Barcadera temporalmente.  Riba tereno di WEB a traha un fundeshi special fuerte y resistente di vibracion, riba cual e motor lo wordo poni.

   E motor gigantesco aki tin un peso di alrededor di 300.000 kg (300 ton). Cada set motor/generator ta produci awor un capacidad di 18 MegaWatt (MW), cual ta 7 MW mas cu motornan actual di planta RECIP3.  Dialuna ya for di 4’or di marduga caba tabatin personal encarga cu e transporte presente na Waf.  El a wordo baha for di e barco di carga, y poni riba un trailer special cu monton di wiel y cu por sostene e peso.  Un poco prome cu 8:40 am, e transporte a start saliendo for di Barcadera.

    Como 475 meter pabao di tereno di WEB, riba e caminda aki tin un brug cu un duiker construi.  Ey tin e rooi conoci como ‘Rooi Bosal’ ta pasa bao di dje (tin algun hende ta yame ‘Rooi Barcadera’ tambe).  Pa precaucion cu e motor di 300 ton por ta mucho pisa pa e brug aki, mester a bin cu grua grandi pa asina a pone plachinan temporal di hero riba dje pa fortalece y yuda sostene e peso, y evita cu e brug ta kibra bao di e peso.  Tur esey ta un trabao grandi cu a wordo haci e mainta ey.

   DIARIO a compronde cu den curso di e siman aki y otro siman lo transporta un motor mas y e generatornan corespondiente.  E proyecto mes lo finaliza y keda cla pa luna di Augustus, y e isla lo bay tin mas capacidad di coriente.