Un anochi special pa e 30 graduadonan di Scol Practico pa Ofishi Brazil

ORANJESTAD (AAN): Recientemente a tuma lugar e ceremonia di graduacion di Scol Practico pa Ofishi (SPO) Brazil cu a tuma luga na Cuts & Curves party place na San Nicolas.

Durante e anochi special a celebra e hecho cu 30 alumno a gradua den e ramo di Tecnica/ Cuido di Mata y Bestia of den e ramo di Administracion /Comercio y Facilitair.

            Durante e bunita ceremonia di graduacion Minister Endy Croes a felicita e graduadonan den nomber di Gobierno di Aruba y a expresa cu ta hopi orguyoso di nan logro. Loke cu boso a logra awe ta e resultado: di boso propio esfuerso, disciplina, dedicacion y determinacion, segun e titular di Enseñanza a enfatisa.

            Pa finalisa e mandatario a gradici inmensamente staf, personal y docente di SPO Brazil como tambe mentornan y tur esnan cu a guia cada studiante pa yega na e exito aki.  El a felicita mayornan y famianan cu a sosten y kere den nan yiu. Masha pabien tur graduado y hopi exito den futuro. ‘Dream big and aim high’!