BOGOTA: Algo cu a bira viral recien, danki na e plataforma di TikTok, ta un popchi parecido na Barbie,
y inspira pa e cantante Karol G di Colombia, cu den ultimo lunanan ta dunando hopi concierto na Latino America.
Karol G su conciertonan ta yena y sold-out mesora, y su fanaticonan ta keda satisfecho cu e presentacionnan, danki na su invitadonan di taya mundial. E ta conoci tambe como ‘La Bichota’, y awor mescos cu hopi famoso, e tambe tin un version den un popchi cu sigur lo bay wordo desea pa hopi mucha chikito na cas.
Shirly Paola Cabrera Esqueda di Sincelejo na Colombia, a dedica henter su bida pa traha figuranan di tamaño chikito cu personalidadnan mas famoso di musica, di social media, y di farandula Colombiano y internacional.
Debi na e exclusividad di e popchinan cu e doño di Fefamdoll ta fabrica, e idea cu a bin pa traha un version mini di Karol G, a pone cu e prijs di e tipo di popchinan aki ta mas caro cu normal.
Pa cada personalidad, e ta traha djis un modelo di esey, y pa tal motibo e creacionnan ey, manera esun di Karol G por wordo bendi entre 300 mil y 700 mil Pesos Colombiano (entre 122 y 285 Florin Arubano).
Segun e creador, e popchi ya caba ta rumbo pa wordo entrega na e cantante Colombiano, y e ta conta cu detayenan unico manera un mic, dos bistir diferente, un trahe di baño inspira riba e videoclip di ‘Provenza’, y un bisti di gala cu el a usa.
Ademas, Shirly a añadi un popchi mucha homber estilo Ken, di e tata di Karol G, cu bo ta mire cu un jacket preto y jeans. Un look inspira riba un potret di nan dos, y bo ta mire patras di e caha den cual e modelo di popchi aki ta wordo poni pa ser bendi.
