Trahando riba plannan pa bin cu un Mural nobo pa honra Julio Bernardo Euson

Prome Minister Eman den dialogo cultural na San Nicolas:

ORANJESTAD (AAN): Durante su bishita reciente na San Nicolas, Prome Minister Mike Eman a reuni cu representante di artistanan urbano Tito Bolívar, conoci pa su murals emblematico cu ta duna color, historia y identidad na e distrito.

   San Nicolas ta sigui capta mas y mas atencion, no solamente di turista, pero tambe di comunidad local, cu ta reconoce e balor cultural di e murals, cu ta honra figuranan prominente di Aruba. Den e reunion, a comparti e idea pa crea un mural nobo, cu lo duna reconocemento na Julio Bernardo Euson, entre un di e gran musiconan cu Aruba a conoce.

   Recientemente, a haci un bishita na Julio Bernardo Euson na San Nicolas, un artista cu a logra reconocrmento internacional, incluyendo presentacionnan na Chile y participacion den festivalnan musical na Europa. A pesar di su gran aporte cultural, su legado no semper a keda debidamente resalta den pasado. E mural nobo ta busca coregi esaki, duna honor mereci y reintroduci su figura na conciencia colectivo.

   E lugar elegi pa e mural ta Chocolate City, un establecimiento bon conoci na San Nicolas, cu su ubicacion y significado cultural ta haci di dje un espacio adecua pa un reconocimento di e caliber aki. Tito Bolívar a acepta e encargo cu entusiasmo, comprometiendo pa captura e escencia y rostro di Julio Bernardo Euson cu precision artistico y respet historico.

   Segun e plannan, e inauguracion di e mural ta proyecta pa 17 di maart, den marco di actividad grandi relaciona cu e conmemoracion di 40 aña di Status Aparte, pa duna asina un contexto aun mas profundo na e acto di reconocimento cultural.

   E proyecto aki ta forma parti di un vision mas amplio pa fortalece San Nicolas como capital di street art di Caribe. Cu mas di dies aña caba cu e murals ta forma parti di atraccion turistico, e distrito ta sigui transforma su espacio publico den un galeria abierto, resaltando talento local y reafirmando cu artista Arubiano a alcansa un nivel profesional y aprecia no solamente na Aruba, pero tambe internacionalmente, ta locual Tito Bolivar a comparti.

   Prome Minister Eman a expresa su aprecio pa e iniciativa y pa e colaboracion entre artista, comunidad y lider cultural, enfatisando cu arte y cultura ta pilar escencial den preservacion di identidad y desaroyo di ciudad.