Aruba Airport Authority a honra y premia e monarcanan di Carnaval 72

Durante un ceremonia special

ORANJESTAD (AAN): Aruba Airport Authority N.V. (AAA) orguyosamente tabata anfitrion di un ceremonia pa entrega premio pa honra e ganadonan di e eventonan di Carnaval organisa pa SMAC, incluyendo e monarcanan di Carnaval, como parti di e di 72 temporada di Carnaval di Aruba.

Como un patrocinado dedica na e herencia cultural di Aruba, AAA a partner cu SMAC pa reconoce e personanan kende nan pasion, creatividad y dedicacion ta mantene Carnaval bibo aña tras aña. Durante e ceremonia, e team di AAA a expresa aprecio na e ganadonan y e participantenan, reconociendo nan rol importante den preservacion y celebracion di e identidad cultural di Aruba.

“Carnaval ta un parti importante di cultura y herencia di Aruba,” asina Marylin Feliciana, Marketing & Communications Manager na Aruba Airport Authority a expresa. El a continua bisando cu: “E participantenan ta esnan cu ta mantene e tradicion aki bibo pa medio di nan dedicacion y talento. Na AAA, nos ta orguyoso di por sostene Carnaval y ta gradici esnan cu ta sigui hiba nos cultura padilanti pa futuro generacionnan.”

Durante e ceremonia, e monarcanan di Carnaval y demas ganadonan a ricibi tasnan di AUA hunto cu vouchernan di biahe loke ta duna nan e oportunidad di biaha pa destinacionnan cu nan ta desea di conoce, saliendo for di Aeropuerto Internacional Reina Beatrix. E destinacionnan ta inclui rutanan pa Argentina, Colombia, Peru, Merca y varios destinacion den Caribe, resaltando e conectividad creciente na Aeropuerto di Aruba.

Mientras cu e celebracionnan di Carnaval ta continua, AAA tambe ta extende su aprecio na tur e participantenan di Carnaval y e musiconan cu ta forma parti di e paradanan cu ainda falta y na SMAC, organisado oficial di eventonan di Carnaval, pa nan esfuersonan continuo den mantene e tradicion cultural aki bibo.

Como e porta principal pa tur biahero, Aeropuerto di Aruba ta hunga un rol clave den conecta cultura di Aruba cu mundo. Pa medio di sosten continuo na e actividadnan di Carnaval, AAA ta keda comprometi pa celebra herencia di Aruba, fortifica turismo y sostene e comunidad cu ta haci Carnaval posibel.