Tin total di 60 artista ta competi pa titulo di Soca Monarch 2026

A tira lot pa e dianan di Pre-Finals

ORANJESTAD (AAN): E compania Setar NV tabata presente na The Casino na The St. Regis Aruba Resort hunto cu Stichting Musica, otro patrocinadornan  y prensa pa sera conoci cu e secuencia di e bandanan cu lo participa na e dos anochinan di prefinals dia 20 y 21 di Januari pa Soca Monarch 2026.

   Como sponsor oficial di Carnaval y Stichting Musica, Setar NV a indica cu nan ta orguyoso pa un biaha mas apoya y sostene e festival di Soca Monarch 2026.  Esey ta bin debi cu e compania ta mira e importancia pa conserva nos cultura y apoya nos talentonan local cu ta competi den e evento aki. Laga nos para hunto cu nan y haci e festival di e aña aki aun mas grandi y exitoso.

   Tabatin trekmento di lot, y aki DIARIO ta presenta e secuencia pa e Pre Finals di Soca Monarch Contest.

   Pa dia 20 di Januari lo tin: (1) DURO, (2) Hot Ones Band, (3) Groove Masters, (4) Tsunami, (5) OREO, (6) SUONA, (7) N’Fuzion.

   Pa dia 21 di Januari lo tin: (1) Zeta Band, (2) Buleria, (3) D’Nova, (4) Youth X-Treme, (5) Avanti, (6) Good Times Band, (7) Shine Music.

   Pues tur entusiasmo tey pa mira kende lo bira sea Soca Monarch Queen of Soca Monarch King pa Carnaval 72.  Bunita pa mira cu tin 14 banda musical y total di 60 artista compitiendo den Aruba Carnival & Entertainment Village na San Nicolas.  Ainda por cumpra tickets na Pay.aw cu ta e forma mas facil.  Pa single ta cobra 25 Florin, y pa pakete di tur dos anochi, tin special di 35 Florin.

   Esnan cu no por bay y kier mira tur esaki na cas mes, por cumpra e pakete di Pay-per-View cu ta ser yama “Soca in your Backyard PPV”.  Bo por haci esaki pa haya tanto Pre-Finals di 20 y 21 di Januari, of e final grandi cu ta 31 di Januari 2026.  Pa haci esaki bo tin di manda mensahe via WhatsApp di Setar na 525-1002.   Esnan cu kier mira esaki via streaming online, tin di bishita e website di ppv.setarcode.aw pa logra esey y mira e competencia sea riba bo smartphone, tablet, smartTV of riba bo computer.

   E potretnan aki pa cortesia di Setar NV.