Minister Gerlien Croes:
ORANJESTAD (AAN): Entidad deportivo tin 3 miembro di Raad nobo, nombra pa Minister di Deporte, pa tuma responsabilidad pa guia, conseha y controla e organizacionnan den e temporada nos dilanti. E renobacion di e hunta ta forma un paso strategico pa sigura cu e maneho di fondonan destina pa deporte na Aruba ta tuma luga den un ambiente di transparencia, integridad, seriedad y cumplimento debido.
E hunta nobo lo ta encarga pa evalua, supervisa y fortalece e proceso interno di Fundacion Lotto pa Deporte y otro entidadnan, cu e meta pa garantisa cu cada Florin di e fondo deportivo ta wordo utilisa riba un manera husto, cu transparencia y cumpliendo cu ley. A traves di regla y procedemento mas fuerte, e organizacion ta compromete pa mantene un nivel halto di profesionalismo y responsabilidad na beneficio di e comunidad deportivo di Aruba.
E restructuracion general aki tumando luga den deporte, ta demostra un compromiso firme pa traha cu integridad den sector deportivo, y pa crea un base fuerte pa crecemento sostenibel. Un sistema di supervision mas robusto den nos organizacionnan ta pa garantisa cu confianza di pueblo y deportistanan ta wordo proteha, y cu e fondonan ta yega na destinacion corecto y cu merece.
Minister di Deporte, mr. Gerlien Croes ta expresa su gratitud na tur miembro nobo, abogado America Barrios – hurista fiscal Gerald Moreta y profesional den negoshi internacional y maneho di mercadeo Danielle de Miranda, pa nan profesionalismo y disponibilidad pa nan servicio na comunidad, y ta deseanan exito den e responsabilidad nobo aki. Cu vision cla, Minister di deporte ta tuma un otro paso firme pa fortifica deporte y bienestar deportivo riba nos isla.
