Aruba Bank ta reforsa beneficionan di empleado cu CAO nobo di 4 aña

Contract nobo firma cu FTA

ORANJESTAD (AAN): Aruba Bank ta orguyoso di anuncia cu a logra un acuerdo riba un Convenio Colectivo di Obrero (CAO) nobo pa cuatro aña, despues di negociacionnan constructivo cu FTA – Federacion di Trahadonan Arubano.

   E acuerdo aki ta reforsa e compromiso continuo di e Banco cu bienestar, seguridad financiero y stabilidad di su empleadonan.

   E base di e CAO nobo ta un mehoracion importante di e Plan di Pensioen. Pa fortalece seguridad di retiro di empleadonan, Aruba Bank a aumenta e contribucion di empleado pa 15%, garantisando un mihor futuro pa tur.

   Ademas di e mehoracion den e plan di pensioen, e CAO ta introduci varios mehoracion importante pa sostene empleadonan y nan famia:

   E puntonan clave di e CAO nobo ta: (*) Permiso di ausencia mehora: E cantidad di dianan pa acompañamento di familiarnan inmediato di un empleado cu ta cuidando pa un familiar durante y/of despues di hospitalisacion a wordo aumenta na 3 dia laboral. (*) Seguro Medico mehora: Cobertura medico mehora pa tur empleadonan.

   Tambe tin: (*) Ahuste di Costo di Bida: E limite di Costo di Bida a wordo aumenta significativamente y alinea cu e limiet di SVB, pa mantene salario competitivo cu cambionan economico.

    E acuerdo aki ta muestra di e balor cu Aruba Bank ta duna na su empleadonan. Cu e aumento di contribucion di pensioen, e mehoracion di seguro medico, aumento di e limiet di costo di bida, y e sosten pa famia, e banco ta inverti directamente den bienestar y futuro di su empleadonan.

    Aruba Bank ta aprecia e colaboracion cu FTA y ta sigui comprometi cu fomenta un ambiente di laboral sostenibel, husto, sostenibel y orienta riba futuro pa tur empleadonan.

    E acuerdo aki a wordo logra danki na esfuersonan colaborativo di Sr. Hose Figaroa, Sr. Aldrick Pontilius and Sr. Ryan Giel, representando FTA, y na nomber di Aruba Bank, Señora Marleen van der Borgt, Señora Nataly Simmons, Señora Militza Oduber-Gietel, Señora Gjalynn Kolfin, hunto cu e shop stewards Señora Mirla Koolman y Señora Ninette Croes.