Studiantenan di Facultad di Turismo cu donacion na Fundacion Salba Nos Burico

ORANJESTAD (AAN): Siman pasa, e alumno nan di Facultad di Turismo di Universidad di Aruba a bishita Donkey Sanctuary

pa entrega nan donacion di 2.200 Florin na fundacion Donkey Sanctuary Aruba, tambe registra como Fundacion Salba Nos Burico.

   Como parti di nan curriculum universitario, en coneccion cu nan curso di MICE: Meetings, Conventions and Events, e studiante nan mester a organiza evento nan como parti di nan studio experimental. A dicidi cu cada grupo lo organiza un evento pa recauda fondo nan pa un fundacion den comunidad y asina reinforza responsabilidad social den nos comunidad. Como parti di un desaroyo sostenibel, un di e aspect nan importante, ta e bienestar di nos mes un comunidad.

   Di e forma aki, duranti luna di April 2021, diferente grupo nan for di  Facultad di Turismo a organiza fundraising nan pa diferente fundacion nan, entre otro Stichting Rancho cu vitual workshop con ta sembra bo mes un fruta y berdura nan, diferente actividad nan pa recauda fondo nan pa Fundacion Respeta Mi, Fundacion pa Nos Comunidad y Luna Foundation, Telefon pa Hubentud, entre otro nan, y den e caso aki, tambe un di e grupo nan a recauda fondo nan pa Donkey Sanctuary.

   Donkey Sanctuary a worde funda na 1997. Nan tin den nan cuido 121 burico, caminda cu nan por tin un habitat natural, un lugar pa biba cu suficiente cuminda, awa, suficiente sombra for di solo y tambe fruta nan dushi pa come como treat.

   Burico nan a yega Aruba den aña nan 1500, y nan tabata tin un rol hopi importante den e distribucion di awa na Aruba, tambe como medio de transporte y pa transporta comestible nan etc. Den e aña nan 1900 burico nan a worde reemplaza pa auto nan, y nos hende nan no tabata tin mester di nan burico nan mas. Nan a worde laga den libertad y riba nan mes.

   For di e 121 burico cu tin den 40.000 meter cuadra di Donkey Sanctuary, 60% ta macho y 40% nan ta hembra. Buriconan ta biba un promedio di 35 aña. Cada un burico ta come 2 kilo di hay pa dia, y por lo menos 500 gm di pellets pa dia, cada un ta bebe 4 gallon di awa pa dia. Cada burico ta costa aproximadamente $60 pa luna pa worde cuida debidamente. Durante e lock down cu Aruba a pasa pa motibo di Covid, casi no tabata tin bishitante nan y esaki a pone cu a bira hopi dificil pa por a cuida e 121 burico cu tin na e sanctuary.

  E a bira un preocupacion cu nan lo mester a cera nan porta, of kizas habri nan porta nan y laga e burico nan liber, pero hopi di nan no por cuida nan mes si worde laga den libertad. Nan ta biba na e Donkey Sanctuary caminda nan ta liber for di cualkier maltrato, y liber for di accident nan di trafico.

   Como evento pa recauda fondo, e studiante nan a organiza benta di snack boxes duranti diferente dia nan, y por a yega na e bunita donacion di 2.200 Florin pa Donkey Sanctuary.

   E fundraising aki pa Fundacion Salba Nos Burico a worde organiza door di e siguiente studiante nan: Jose Marcano, Amber Salazar, Kenia Rodriguez y Hannah Lee. E studiante nan aki kier a gradici nan docent di MICE: Señora Jo-Ann Croes, Staff di Universidad di Aruba specialmente Facility Management Team pa nan cooperacion, marketing department y Circle K Club di Universidad, Tostao Canteen, tur amigo, famia, y colega cu a contribui na e fundraising. Un danki special ta bay na Setar NV pa nan donacion, Don Pastechi Factory y Marcano’s Kitchen, entre otro.

  Na tur es nan cu a aporta na e Snack Sale Fundraising, un gradicimento special. Tambe kier a corda comunidad di Aruba cu Donkey Sanctuary situa na Bringamosa 2Z ta habri diariamente di 9am pa 4pm, entrada ta gratis y e burico nan ta amigabel. E ta un leuk lugar pa relaha y pa bishita como famia. Por cumpra diferente baki nan di cuminda pa duna nan di come y coopera cu e fundacion.

   Riba potret por mira momento nan durante Snack Sale y entrega di e donacion.