ORANJESTAD (AAN) – Den conferencia di prensa di ATHA (Trabao di Hubentud Aruba), Franchesca Heinze, “Regio Manager” di e Proyecto Gen297, a hiba palabra y a describi con e programa aki ta hinca den otro.
El a splica cu despues cu e hoben caba di ricibi su cuminda, tin un momento cu e por haci tarea di scol. Nan tin un ora y mey pa haci esaki, y seguidamente, nan por scoge entre diferente actividad, manera deporte, entre otro dirigi pa AVB (Arubaanse Voetbal Bond) y IBiSA; lo tin diferente expresion di musica tambe, por ehemplo brass band, Arubaanse Muziek tambe lo ta presente, mas tanto riba musica digital.
El a splica cu e actividadnan lo core riba un tema, pa tres luna. E por ta e tema di carnaval unda riba diseño por pensa riba “head piece”, baile por enfoca riba preparacion pa reina, musica por ta brass band of otro tipo tambe.
“E idea ta pa tur actividadnan link cu otro. Por ehemplo, ora cu e hobennan di futbol ta bezig ta competi, e brass band por tey pa apoya, y baile por train pa haci cheer eyden”, Franchesca Heinze a splica.
Seguidamente, Timothy Lake a tuma palabra como Groep Begeleider di Gen297, y na prome lugar el a extende un invitacion na tur nos hobennan pa join e tremendo programa aki.
“Nos ta bay brinda boso un programa cu diferente opcion, actividad, y manera a splica prome pa e hobennan cu no tin mucho actividad pa haci, akinan si lo tin hopi. Pues, hobennan esaki ta boso chens pa join”, Lake a indica.
E kier a encurasha e hobennan pa pasa e voz pa otro hobennan y famia pa participa den e tremendo programa aki, cu ta yen di actividadnan sano cu ta loke Aruba mester aworaki.
El a subraya cu ATHA semper ta bezig ta promove tur tipo di actividadnan pa nos hubentud, y esaki sigur ta un proyecto nobo, un proyecto piloto cu lo ta bay tin un impacto grandi. “Hobennan, join Gen297”! Timothy a expresa.
