Señora Faith convenci cu tin di bin cu comision nobo pa e Santana na Zeewijk

E lugar ta sushi y hopi na werki

ORANJESTAD (AAN): Despues di a biba 30 aña na Hulanda y awor e ta bek riba e isla, cu hopi perseverancia e kier haci algo pa asina mehora e Santana Catolico Santa Teresita cu tin na San Nicolas.

   Ta trata aki di señora Faith, kende tin e confianza cu por trece cambio, drecha, y haci e santana aki aun mas digno na honor di esnan cu ta dera eyden.

   El a splica na DIARIO, cu ya caba e tin un peticion pa drecha Santana, y e tin riba 300 firma acumula caba.

   “Mi kier informa pueblo cu e santana Catolico aki ta sushi, grafnan ta tur kibra, varios graf y kelder ta habri, hopi destruccion cometi eyden, y bo ta bira cara y mira hopi sushi.  Tambe keto bay tin grafnan sin nomber.”  Esey ta loke señora Faith a indica na DIARIO.

   El a splica cu el a reuni caba cu Pastoor di Parokia Santa Teresita na San Nicolas, pero e no a yega na un solucion.  E ta lamenta tambe cu actualmente e Comision di Santana pa esun di Zeewijk no ta funcionando como debe ser.

   Mirando cu tin mester di cement pa asina haci reparacion na algun kelder y graf, señora Faith riba su mes a logra di haya 3 biaha, patrocinadornan cu a yuda cu cement.  El a keda tristo ora el a haya sa cu no a haci ningun bon uso di e saconan di cement aki ricibi como regalo.

   “Asina aki, e cement di sponsornan a bay perdi debi na descuido y falta di mantencion cu e Santana aki no ta ricibiendo.”

   Kico mas e por haci?  Señora Faith tin tur bon intencion pa asina mehora e Santana aki, pa honor di famia y esnan dera y sosegando nan paz eterno eyden.

   “E caso aki ta preocupa hopi hende cu a dera nan famia na e Santana aki, y algo tin di wordo haci.”