Ritmo Cubano Company Aruba lo ta presenta Diamars anochi den America’s Got Talent

Aruba su nomber atrobe riba stage internacional

ORANJESTAD (AAN): Gobierno di Aruba, specialmente Ministro Xiomara Maduro ta hopi anima, ora el a haya sa cu e grupo di artista Ritmo Cubano Company Aruba (RCC Aruba) lo representa Aruba durante un audicion na e show America’s Got Talent di NBC-TV na Merca.

   Aña pasa e grupo di artistanan aki a participa na un competencia internacional di Circo ‘Budapest Circus Festival’ na Hungria, representando Pais Aruba. RCC Aruba a gana e tercer premio y un premio special. Esaki ta un premio cu ta worde otorga pa e grupo cu a haya mas aceptacion di e publico. E participacion na e Festival Internacional aki a pone cu RCC Aruba a haya hopi atencion internacional y tambe contratonan na Circonan di renombre internacional.

   E promotornan di e programa America’s Got Talent tambe a keda impresiona cu e presentacion di RCC Aruba y a invita e Grupo di artista pa presenta den e show Mericano.

   Pa haci esaki tabata henter un proceso, ya cu RCC Aruba mester a haci dos presentacion prome y si nan pasa e presentacionnan aki, nan lo por haci e audicion di America’s Got Talent.

   RCC Aruba a completa e presentacionnan cu exito y lo ta riba tarima internacional un bez mas promoviendo Aruba su nomber.

   Minister di Cultura ta invita un y tur pa sintonisa e show pa presencia e presentacion di RCC Aruba. Minister Xiomara Maduro ta gradici tur e artistanan di RCC Aruba pa e tremendo trabao cu nan ta haci promoviendo Pais Aruba internacionalmente

   America’s Got Talent ta pasa Diamars anochi pa 8:00 pm na e canal di WNBC, cu por ser mira tanto riba High Definition como tambe señal normal di canal 15 na CableTV di Aruba.  E programa ta dura 2 ora.