Sigui haci tur bo best pa e turistanan aki bandona Aruba completamente satisfecho

ORANJESTAD (AAN): Aunke nos tin Cuerpo Policial, monton di Security Guards, y trahadornan honesto den sector di horeca cu ta desea pa tur cos ta bay bon cu e bishitantenan.

 Toch pensa si abo cu ta biba riba e dushi pida baranca aki cu yama Aruba, kico bo a haci pa contribui pa turismo ta mas safe y agradable?

   Ta bon conoci cu hopi ta e turistanan cu diariamente ta yega Aruba, cu e pensamento di pasa un dushi vakantie. Tambe ta wordo propaganda cu na Aruba, e hendenan ta hopi cordial (antes), pero awendia bo ta haya e generacion nobo y hopi di esnan cu a bin biba na Aruba, cu no ta cordial mas y ta trece un sorto di mal propaganda pa cu nos turismo.

   Na final di e vakantie, sigur lo tin un 90 porciento cu ta regresa nan pais cu bunita recuerdo di nan bishita nan Aruba. E problema ta cu e 10 porciento cu ta bay cu mal experiencia, por ehempel cu nan a wordo horta of a haya mal servicio of ta keha cu Aruba a bira mucho caro, ta esnan cu nos mester pone hopi atencion ariba dje, ya cu ora nan yega bek na pais, e mal propaganda aki ta wordo comparti y prome cu bo pensa, tin un 30 porciento cu a tende di e mal propaganda aki, cu lo bolbe reparti’e cu un otro 25 porciento mas y cu despues por bira un mega mal propaganda pa Aruba.

   Mester ta hopi cauteloso cu e parti aki, specialmente mirando cu turismo ta nos unico pilar existente cu ta sobra nos, pa asina Aruba logra keda cabez ariba awa. Si bo ta biba ariba e dushi pida baranca aki, pensa 20 biaha prome bo hasi cu e 20 porciento di turista cu bay cu un sabor amargo di nos pais, nan keda cune, y subi avion keto bay cu un mega mal recuerdo di Aruba.

   Recien a sali un relato cu na Aruba tin ultimo tempo hopi hende cu ni ta pone un sonrisa mas riba nan cara desde cu e Pandemia a start.  Sigur tin di bin cu un cambio eynan, principalmente esnan cu ta atende turista tur dia!  Pone un smile riba bo cara, laga nan sinti cu nan ta riba e isla feliz.

   Trece un cambio!  Saluda nan!  Combersa cu nan!  Y principalmente proteha nan!