Minister Dangui Oduber:
ORANJESTAD (AAN) – Minister Dangui Oduber, Titular di Salud y Turismo, durante e ronda di pregunta den conferencia di prensa di Diahuebs, a elabora tocante e preocupacion di HAVA (Asociacion di Docternan di Cas Aruba), relaciona cu e scarcedad di huisarts cu tin na Aruba, y e cantidad di pashentnan cu cada un di nan tin cu carga.
E mandatario a bisa cu algun dia pasa el a reuni cu HAVA, cu a mustra e preocupacion aki unda tin hopi presion riba e docternan di cas, y esaki tin e minister su atencion y di AZV tambe.
Oduber a bisa cu pesey AruBig ta asina importante pa duna e studiantenan local di medicina e oportunidad pa sigui studia den e region, manera na Costa Rica, Colombia, Canada y Merca, pa asina nan bin bek pa yuda Aruba atende cu tur e retonan cu tin. El a agrega cu AZV tambe ta buscando diferente oportunidad pa asina yena tur e vacantenan di docter di cas cu tin habri, cu falta pa asina reduci e presion cu tin.
E minister a remarca cu e presion aki no ta solamente na Aruba, pero e scarcedad di personal den cuido, ta algo mundial. El a reitera cu AZV ta trahando pro-activamente den esaki.
