Proyecto piloto di intervencion trempan pa muchanan cu necesidad special a cuminza

ORANJESTAD (AAN): E prome etapa di e proyecto piloto di intervencion trempan pa no nos muchanan cu necesidad special den centro di cuido pa mucha,

a cuminza y Dialuna tabata tin un session di brainstorming, unda cu dos profesional di University of Missouri-Kansas City Institute for Human Development (UMKC-IHD), Dr. Kelly Hantak y Dr. Michael Abel a duna nan aporte.

DIARIO a entrevista Anouk Eman, kende ta lider di e proyecto.

Eman na 2016 a caba su Masters y a haci Early Intervention in Autism and Sensory Impairment.

El a haci su tesis riba e hecho cu na Aruba nos no tin un intervencion trempan pa e casonan aki .

Su juffrouw Dr. Hantak semper kier a bin Aruba pa yuda cu esaki y awor esaki a bira un realidad.

Diamars Hantak y Abel a brainstorm cu tur e stakeholders, incluyendo entre otro minister di Asuntonan Social Glenbert Croes, Departamento di Mucha y Hoben (DMH), JGZ, Brighter Future y Fundacion Autismo Aruba.

“Nos ta brainstorm cu e stakeholders cu tin un rol importante den e proyecto aki y e meta no ta solamente pa e profesionalnan di Merca bin Aruba y copy-paste un sistema cu ta funciona na Merca, sino brainstorm cu tur e stakeholders na Aruba cu tin añanan di experiencia y conocimento di tur locual ta pasa na Aruba”.

E intencion ta pa yega na un intervencion trempan, unda cu nos ta bay crea esaki hunto cu e experticio di e dos profesionalnan, segun Eman.

Pa e proximo paso di e proyecto aki un di e profesornan ta bay regresa na September, unda cu ta bay haci un evaluacion riba 30 mucha den e centronan di cuido di mucha pa haya data, pasobra Aruba no tin data actualmente.

“Despues nos lo busca fondo internacional pa e proyecto aki por sigui sigur cu un meta di 10 aña”, segun Eman.