Awe Marisol bin splica kico a pasa cu placa y tereno di Pueblo bou su gobernacion - *Cuanto hende por a come cu e placa cu el a uza pa brug di cas di Madushi? - *E escandalo increibel di 2020 a baha nivel politico te na haltura di circo
ORANJESTAD(AAN)—Kico Marisol Lopez-Tromp concretamente a haci pa Aruba? Kico ta e logro grandi di Marisol Lopez-Tromp for di su entrada den mundo politico di Aruba, caminda el a sabi di sirbi su interes propio?
Ora papia di Marisol Lopez-Tromp ta papia di un fenomeno, cu a marca historia di Aruba.
Loke Marisol Lopez-Tromp a logra pone tras di su nomber como politico na Aruba, ta drenta historia di e pais cu un peso enorme di pregunta cu nunca a haya contesta.
Ora repasa historia politico di Aruba, ta mira Marisol bula di partido pa partido y sigur no como super woman.
Si repasa tur e damanan cu a sirbi Aruba den historia politico di e pais, e figura di Marisol ta bini dilanti como un muhe cu ta provoca miedo cu e por forma un escandalo manera otro no por.
Como miembro di MEP Marisol a drenta politica, caminda el a logra uza mas cu Mey Miyon di placa di Pueblo pa traha un brug pa yega cas di su Madushi. Algo increibel hasta den mundo di politica.
Marisol di e forma aki a presenta su mes como un fenomeno unico di Aruba, cu a mira con placa cu por a alimenta cantidad di pober, hasta construi diferente cas pa hende sin dak riba nan cabez, a wordo uza pa e cas di madushi a haya aseso directo pa uno di e careteranan mas importante di Aruba y asina naturalmente subi e balor di e cas di Madushi sin gasto pa tur cu conoce e tereno aki como nan propiedad.
Marisol a sigui dilanti manera nada a pasa. El a logra loke e tabata kier y aparentemente esaki ta suficiente pa Marisol.
Kico tin tras di e fenomeno di Marisol, cu a bandona fila di MEP y despues a drenta fila di AVP, cu a duna su persona e puesto di Presidente di Parlamento.
E no a cada cu AVP pero su nomber si a keda den historia di Parlamento bou e categoria di pelea.
Su cantidad di votonan a baha pero asina mes el a bula den e neishi di POR di Otmas Oduber. El a keda den POR y a haya chens pa bolbe como Ministro ora Oduber a baha como Ministro.
2020 a bira un tristeza pa Aruba, cu a mira su hendenan ta muri den pandemia. Pero 2020 ta drenta historia como e temporada cu Marisol a crea uno di e espectaculonan mas grandi cu historia di Aruba a conoce ora el a nenga di debolbe POR su puesto di Ministro y hinca Aruba na uno di e momentonan mas doloroso den historia di e pais, den un escandalo politico.
Cu menasa cu e ta bay demostra con corupto henter mundo ta, Marisol a crea su salida for di POR sin cu Aruba a ripara cu atrobe Marisol a duna su amor pa su famia.
Tereno pa Lelicia a wordo regla cu ayudo di DIP, cu tambe mester splica un que otro den e asunto aki. Pasobra nada ta di Marisol. E brug ta cu placa di pagadonan di belasting a logra bira realidad. Cu placa di Pueblo a paga Marisol tempo cu e tabata den Parlamento y Ministro. Tereno pa Lelicia, su ruman y su miembro di partido MAS, ta di Pueblo. Placa cu a wordo paga na Alexander Wernet pa overtime abundante, ta di Pueblo.
Hende cu a keda sin trabou den pandemia no a haya loke tabata wordo paga na Alexander Wernet como coordinador di Marisol Lopez Tromp, cu a crea un escandalo total cu a kita bista y atencion di Pueblo, cu a lubida den ansia di morto di Covid-19 con Marisol a construi e brug di Madushi sin tene cuenta cu hamber di hende pober.
Na 2021 Marisol a tabata tin mester di un lista y a haya MAS cu el a bay inscribi como su partido. Kende mas ta riba su lista? No ta cos di puntra.
Pakico e mester bolbe den politica? Pasobra un grupo di hende a bay su cas, caminda el a sali sin sapato na su pia pa tur fotografo mira.
Den circulo di damanan hopi a wordo papia.
Pero Marisol ta di regreso den politica. Kico y kende tin su tras? Riba e foto di Marisol na su cas, por a mira votado y esaki mester representa “kico y kende”.
Marisol debe Aruba algun splicacion clave. Kico a pasa atrobe cu tereno di Madushi? Kico a pasa cu placa di overtime pa Alexander? Pakico Marisol no kier a bandona POR, aunke e tabata bisa cu e no por cu POR?
