ORANJESTAD (AAN): Pa loke ta turismo 2021 por bisa cu Aruba ta moviendo for di escenario cauteloso-optimista y ta premira un grado di recuperacion di 55 porciento.
Ronella Croes, CEO di Oficina di Turismo a laga sa cu te aworaki cu e di dos mitad di aña a inicia lo por ta moviendo den e escenario optimista.
Esaki kiermen cu ta recupera minimo di 60 % di locual a mira na 2019. E calculacionnan ta duna aworaki un recuperacion pa e aña aki di 68 % di locual a ricibi na 2019, si mira e aña completo, a remarca.
Esaki ta ainda 32 % menos di e ultimo aña normal pa turismo di Aruba y mester keda tene esey presente cu no ta un recuperacion di 100 % ainda. Pero por conclui cu e grado di recuperacion a acelera y ta premira cu esaki lo sigui ta canando na un manera hopi sano den e lunanan benidero, Croes a enfatisa.
Un di e motibonan pakico ta bisa esaki ta pasobra Aruba ta un di paisnan cu ta canando dilanti den Caribe. Ora cu compara Aruba su desaroyo y recuperacion di januari te cu april, sin papia di locual ta spera, por conclui cu Aruba definitivamente ta canando dilanti den Caribe.
Ora di compara e resultado cu otro paisnan, esaki ta duna un bista di e hecho cu Aruba ta eyriba apesar di e caida cu Aruba como otro paisnan a conoce den e lunanan anterior.
Por mira cu e caida di Aruba ta ainda mas leve compara cu otronan di cual por bisa cu e caida ta entre 60 y 65 porciento y tin biaha mas halto.
Banda di Aruba den Caribe por mira cu Republica Dominicana ta canando cabes cabes cu Aruba pa loke ta trata grado di recuperacion y no riba e grafico, pero tambe e datonan ta mustra cu Puerto Rico y US Virgen Islands lo tin tambe e mesun grado di recuperacion cu Aruba, Ronella Croes a señala.
Nan no ta rekeri un resultado di test negativo ora di bishita, a agrega.
Tur e aspectonan menciona ta yudando pa Aruba ta cabes cabes cu nan y sigur fuerte den Caribe y dilanti di otronan, y cu e otronan tin ventaha competitivo riba Aruba, pero asina mes Aruba a sa di mantene su posicion fuerte den Caribe, e CEO di ATA a duna di conoce.
