Promedio di 78% di Aruba a wordo vacuna caba

Vacuna keto bay ta e proteccion mas importante

ORANJESTAD (AAN): Diamars mainta durante un conferencia di prensa pafo net banda di e Mobile Unit dilanti ImSan na San Nicolas, unda a cuminza duna vacuna y booster shots na pueblo di Aruba, Prome Ministro Evelyn Wever-Croes a bisa cu vacunacion keto bay ta e proteccion mas importante, y e ta loke nos a mira cu ta duna e proteccion cu nos ta buscando pa nos mes y nos famia.

   No ta tur hende kier vacuna, y Gobierno ta respeta esey.  Pero ta urgi tur esnan cu por vacuna, pa por fabor bay vacuna.

   Ya caba por mira cu esnan vacuna ta esnan cu menos ta wordo afecta.  Bo por haya Covid cune, pero e ta yudabo cu bo no ta bira hopi malo di dje.

   Na e momentonan aki, por mira cu 83% di ciudadanonan riba 60 aña di edad tin 2 dosis di vacuna caba.

   Di e grupo di 18 te 59 aña di edad, 74% di ciudadanonan tin 2 dosis di vacuna caba.

   Di e grupo di 12 te 17 aña di edad, 56% di hobennan tin 2 dosis di vacuna caba.

   Esaki ta duna Aruba, un promedio di 78% di e pais cu a wordo vacuna completo.

   “Esakinan ta cifranan halto, pero e no ta e caminda unda cu Aruba kier ta ainda,” Wever-Croes a mustra.

   Tin hopi hende cu falta pa busca nan di prome vacuna, y nan di dos dosis.  Tambe falta ainda pa busca nan Booster-shot.

   Te cu Dialuna, 17.583 persona a tuma nan Booster-shot na Aruba.  Esey ta representa 23%.  Pues aki tambe tin caminda pa cana ainda.

   Prome Ministro a gradici ImSan pa duna pueblo un oportunidad pa yega eynan y busca nan vacuna.  E Mobile Unit tambe a manera ta un soño cu a bira realidad pa Rino Hermans di BRA Aruba pa e vehiculo aki por yega den skinanan unda kizas hende no ta yega facilmente na centronan di vacunacion.

   E ta contento cu e iniciativa aki, y ta spera cu mirando cuanto hende tin e mainta ey, cu e interes lo keda asina.  E ta un proceso cu mester bay di forma cauteloso, pero cu e Mobile Unit aki ta spera cu tur hende cu por vacuna, lo por bay pa tuma nan vacuna.