— INSULINA — Celebrando 100 aña di un inyeccion cu ta salba bida

ORANJESTAD (AAN): Como un siglo pasa, e nomber di teenager Leonard Thompson a drenta den historia di tratamento di diabetes. 

E tabata gravemente malo, el a ricibi un dosis inyecta di insulina na un Hospital na Canada, un hangua cu lo a nifica e diferencia entre bida y morto.

   World Health Organization ta calcula cu na mundo tin 422 miyon persona cu ta biba cu diabetes, un malesa cu como 100 aña pasa tabata nifica un morto sigur, pero cu awendia por wordo trata danki na insulina.

   E descubrimento di un tecnologia pa purifica insulina y inyect’e na personanan a bira un cuestion di bida of morto pa e pashentnan, pues e Diabetes Mellitus of Tipo 1 ta cuminza ora bo ta hopi hoben, y como un siglo pasa e tabata djis nifica bo morto.

   E historia di e inyeccion aki ta uno cu ainda ta wordo skirbi, pasobra tin keto bay investigacion nobo andando pa cu mihor tratamento pa Diabetes, for di e asina yama ‘pancreas artificial’, te na pruebanan haci cu ‘stem cell’.

   Tabata 11 di Januari 1922, ora cu Thompson tabatin 14 aña di edad, el a wordo diagnostica cu Diabetes Mellitus dos aña prome y e tabata den Toronto General Hospital na Canada, casi pa muri, unda nan tabata dune un dieta di 400 caloria pa dia, y e tabatin solamente 23 kilo di peso.

   E dia ey el a ricibi e prome inyeccion, pero e no tabata asina exitoso.  Aunke e nivel di glucose a baha un tiki den su urina, a stop e tratamento debi na un reaccion alergico pa cu e extracto di pancreas di cacho cu nan a usa, pero ainda e no tabata suficientemente purifica.

   Sinembargo e team di investigadornan di University of Toronto no a laga nan wordo desanima.  Nan a bay bek pa laboratorio, y dia 23 di Januari nan a dune un otro hangua cu un extracto nobo.

  E biaha aki su condicion clinico a mehora, su cifra di glucemia a baha y e por a cuminza move su curpa bek, y asina Thompson a bira e prome pashent cu a wordo trata cu exito.  Algun siman despues, seis pashent mas a ricibi e mesun tratamento.

   Pa yega na e momento aki tabata fruto di hopi aña di trabao.  Ya for di fin di Siglo 19 caba, algun investigador a mustra den testnan haci cu cacho, cu algun substancia di pancreas ta clave pa regula e nivel di glucose, y den prome añanan di Siglo 20, nan a cuminza haci test pa trata pashentnan cu extracto pancreatico (conoci como ‘bofi’) di animalnan.

   Un figura clave di e descubrimento di Insulina tabata e hoben cientifico canades Frederick Grant Banting, kende na 1921 a propone na esnan na cabez di fisiologia di University of Toronto, esta John Macleod, pa investiga cu yudanza di su asistente Charles Best.

   Frederick Banting a bira e autor di e prome extracto di pancreas cu a wordo inyecta den e teenager dia 11 di Januari 1922, y dia 23 di Januari a ripiti e test, e biaha aki cu un otro extracto traha pa e bioquimico James Collip, kende a pone su talento pa purifik’e.

   E descubrimento di Insulina a duna Frederick Grant Banting y John Macleod e Premio Nobel di Medicina na 1923, un premio cu tabata yen di controversia debi na diferencia di opinion entre e team pa cu e atribucion di e merito.  Otro cientificonan manera Nicolae Constantin Paulescu di Romania y Georg Zueler di Alemania tambe a protesta.

   Zueler tabata traha na Merca y e prome inyeccion den un humano no a ser haci cu exito.  Pero e tabata e prome pa haci un patent di Insulina.  Paulescu tabata esun cu tur hende a lubida, pasobra el a yega na mesun conclusion prome cu Banting, pero e Prome Guera Mundial a pone stop tur investigacion.

   Pero Siglo 20 tabata uno cu a trece monton di avance riba e tereno aki.  E prome tabata cu a pasa pa usa pancreas di baca, y refina ainda mas e proceso di purificacion.  Na 1936 a crea e Insulina Protamina, pa reduci e cantidad di inyeccion na uno of dos pa dia.

   Na 1958, Frederick Sanger a ricibi e Premio Nobel pa determina e secuencia quimico di Insulina, y na 1977 e premio a bay pa Rosalyn Yalow pa un avance espectacular, unda el a logra midi e cantidad di Insulina den sanger.  Poco despues a logra e Insulina Humano recombinante, cu ta evita e rechazo door di e curpa.

   E insulina di absorcion rapido, cu ta duna Docternan mas herment pa maneha e pashentnan, y e prome generacion di Insulina sintetico di duracion largo na aña 2000, y e di dos, ta otro momentonan di historia di tratamento pa Diabetes.

   E invento na 1981 di e prome mini-pomp di Insulina, y despues e prome sensornan, a hiba Siglo 20 na desaroyo di loke ta wordo yama pancreas artificial.  Esaki ta un avance substancial pa e pashent, pasobra e ta combina un sensor di glucose y un mini-pomp controla pa un agloritmo computariza, cu ta monitor continuamente e nivel di sucu den sanger, y ora esaki subi, e ta inyecta e cantidad di insulina necesario.

   Actualmente e investigacion ta poniendo enfasis riba pancreas artificial pa mehora e tecnologia existente, y cu e algoritmonan ta bira mas potente y eficaz.

   Den Diabetes Tipo 1, e sistema inmunologico ta ataca e pancreas y strobando asina cu e curpa ta fabrica Insulina.

   Awendia e trabao ta pa identifica e personanan den riesgo, buscando indicadornan biolgico, cu ta dunabo indicacion cu precision e posibilidad ey y tratanan cu remedi pa preveni cu nan ta bira diabetico.

   Awor ta importante tambe e investigacion cu stem cell pa trata na regenera y yena e curpa cu celnan cu ta destrui e malesa di pancreas y cu e pashent ta capaz di produci su mesun insulina.