Nombramento De Groot a tuma luga den e ‘afscheidbeleid’ di Gabinete Wever-Croes

Minister Gerlien Croes:

• Ministro ta opina cu cosnan no a cana bon
• Ministro no kier a bay den hopi detaye 

ORANJESTAD (AAN): Minister encarga cu educacion, mr. Gerlien Croes, den un entrevista recien cu DIARIO, a duna di conoce cu Enseñanza pa Empleo ta un di e institutonan cu lo ser restructura bastante pa garantisa miho servicio na publico. Minister Croes a remarca cu momento cu el a bira e minister encarga cu e institucion aki, el a encontra situacionnan y indicacionnan di cosnan cu no a cana bon den e organisacion aki. Pa e motibo aki, e minister a enfatisa cu ta necesario pa evalua y investiga e manera cu Enseñansa pa Empleo a wordo maneha durante e ultimo periodo.

   E titular di Enseñanza a duna di conoce cu na februari 2025, den e ‘afscheidbeleid’ di Gabinete Wever-Croes, net un luna prome cu Gobierno AVP-Futuro a sinta, e director nobo Sabine de Groot a wordo nombra pa e gobierno anterior, mientras e gobierno ya a cay. Minister Croes a remarca de Groot no tabata funciona como director prome cu esaki pero si e tabata fungi den diferente trabao y tabata cobra riba companianan Gubernamental.

   Minister Croes a remarca cu tabata tin cierto situacionnan cu a presenta cu personalmente el a haya cu ta inhusto y un falta di respet pa su ministerio cu no a laga e lazo cana debidamente. E Minister a pidi DRH conseho riba e proceso y situacion y a tuma un decision basa riba esaki. Sinembargo, Huez a considera cu no tabata tin motibo suficiente pa termina e laso laboral cu señora De Groot. “Nos ta den dialogo cu su abogado te cu ayera ainda. Nos a sinta cu ne na mesa. DRH tambe a sinta cu ne na mesa pa sinti toch su sentimento”, Minister Croes a remarca.

   Ademas, Minister Croes a duna di conoce, tin algun pregunta entre otro si por continua cu e relacion laboral y si como director, apesar cu e no mester ta un specialista financiero, e tin e capacidad of e base financiero tambe pa carga e departamento.

   “Tin hopi cosnan mas cu mi por menciona pero mi no kier sigui den detaye y ta cosnan cu na e momentonan aki nos tin cu atende cu ne. Pero cu tin un situacion of indicacionnan di situacionnan cu a cana completamente robes cu ta bao di auspicio di e persona aki tambe, esey ta algo hopi preocupante y probablemente lo tin investigacion cu lo tuma luga”, Minister Gerlien Croes a enfatisa.