E lo ta prome cu IPKO
ORANJESTAD (AAN) Presidente di Parlamento Marlon Sneek, den entrevista cu Matutino DIARIO, a remarca cu Bonaire, Saba y St. Statius, ta cay bao Islanan BES. Statius, tempo cu a tene e referendum, no tabata desea di bay bao di ningun otro constelacion y nan a prefera di keda den Antiyas. Pero si Antiyas no tey mas, e no por keda bao cu algo cu tin mas. E ora ey nan a haya nan forza di ta parti di BES.
“Tin cambionan aworaki den loke nos ta yama WolBES, FinBES, cu te a dos leynan cu ta rigi e islanan aki, anto locual cu nan a bin ta haci ta duna informacion riba e cambionan cu tin den e ley y con nan ta haya cu e cambionan aki por perhudica nan derecho di por representa nan comunidad manera mester ta”, Presidente di Parlamento, Marlon Sneek a splica.
Presidente di Parlamento a señala cu manera cu nan a solicita den nan peticion pa bin Parlamento, tabata papia di un “morele steun” (sosten moral) y nan a haye di tur fraccion.
“Ta simplemente cu nos a haya cu den e reunion partidonan di oposicion tabata kier cu ta pon’e riba papel pa wordo firma, pero loke nan a pidi di sosten moral, tur fraccion a duna nan. Loke a keda den meymey tabata e parti cu PPA y MEP tabata kier pone esaki riba papel oficial pa wordo firma”, Sneek a reitera.
Pa loke ta e participacion den IPKO, Presidente di Parlamento a bolbe splica cu e Islanan BES ta cay bao di Hulanda, kiermen Hulanda ta representa nan. “Kiermen, bo no por haya nan sinta na mesa. Locual ta bay pasa ta cu prome cu IPKO semper tin un tripartite, cu ta consisti di Aruba, Sint Maarten y Curacao, anto e ora ey e tema aki ta bay wordo treci dilanti, y nos ta wak den ki forma nos por hib’e bek den presidium, cu ta e reunion cu tin prome cu IPKO tuma lugar, pa bo pone, definitivamente, cuater puntonan, cu ta bay discuti.
E punto 1 ta si bo tin algo mas pa agrega, pero den e momento ey, tur hende cu ta den e presidium, esta Aruba, Curacao, Sint Maarten y Hulanda, mester bay di acuerdo cu cualkier cambio, pa e por ta riba agenda. Kiermen, e ta posibel cu nos lo por trece esaki dilanti como un punto, y si no ta como un punto, nos por trec’e toch como un ‘paper’ of, en todo caso, comparti e preocupacion aki cu IPKO, parlamentarionan di Tweede y Eerste Kamer, cu ta esnan cu lo bay vota riba e dos leynan, unda, cu siguramente, lo bay papia riba e efectonan cu nan lo por tin pa nan”, Presidente di Parlamento Marlon Sneek a señala.
