Aworaki na September ya a yega na 95.814 number
ORANJESTAD (AAN) Señora Meverly Romano, Relacionista Publico di Departamento di Impuesto (DIMP), a menciona cu e proceso di cita di plachi di number a habri cu un total di 92.835 number registra. Aworaki, na September, nos tin caba 95.814 number registra. Kiermen, den 19 luna nos a registra 9.279 number extra, cu ta un average di 331 number extra pa luna. Y e cantidad di clientenan aki ta keda aumenta tur aña.
“Nos a mira cu e cantidad di autonan ta aumentando hopi lihe riba nos Isla, y nos por ripar’e tambe riba caminda, y nos ta weita cu nos ta bay cera na December aworaki cu 96.000. Kiermen, e ta djis un idea pa bo sa con hopi auto nos tin actualmente den tur e categorianan, y naturalmente, e categoria mas grandi cu ta A, nos a yega 81.879, y esaki ta un cantidad basta grandi. Pasobra, antes nos tabata papia di 60 mil number riba nos isla Isla, pero aworaki nos ta papiando di A-autonan 81.879 y nos ta mira tambe un aumento drastico den e brommernan cu a yega 3.292”, señora Romano a señala.
Meverly Romano a duna di conoce cu e incumplimento mas grandi ta den e plachinan number A, unda tin 12.739 persona cu no a paga e belasting completamente, of nan a paga e prome mita so. Riba esey, mi kier aclarea tambe cu e periodo di belasting pa 2025 ta core completamente. Dus, e persona mester tin e belasting di full aña 2025 paga, y no solamente e prome mita. E di dos mita ya e fecha a pasa caba, dia 30 di Juni. Kiermen, e personanan cu ta busca nan plachi di number, mester tin e seguro na ordo, y e pago di e segundo periodo haci tambe tambe.
