Na man di Evelyn, den Nomber di Dios!

Como rehen economico di Citgo y sin placa Aruba a cambia rumbo na 2017 -  Un reportahe special di logro y sobrevivencia di Aruba di 2017 pa 2021 - Un lider a guia Aruba pa cambia menasa di morto den speransa pa futuro

ORANJESTAD(AAN): Matutino DIARIO awe mester entrega e ultimo paginanan di e temporada entre eleccion 2017 y eleccion 2021.

Na 2017 ya Aruba tabata bou supervision di Reino cu a actua na 2014, ora e mameho financiero di Gobierno Mike Eman a pone Aruba na peliger.

Na inicio di 2018, Hulanda a mustra cu e situacion financiero di Aruba ta asina malo cu mester tuma medida pisa.

Panico pa e situacion financiero y loke Pueblo di Aruba lo mester a paga for di su saco pa medio di belasting, a bira total ora e autoridad financiero Algemene Rekenkamer Aruba a entrega na Parlamento e rapport di Bo Aruba, cu a mustra con Aruba durante e proximo 40 aña, lo mester a paga pa proyectonan PPS.

Doloroso tabata e informacionnan cu DIARIO tabata ricibi di e proyecto di Citgo, cu Gobierno Mike Eman a bisa cu na 2018 lo a cambia historia di Aruba, pero a bira un cabuya na garganta economico di Aruba cu a bira rehen di un proyecto cu no por a wordo ehecuta manera henter mundo a spera.

Den e situacion aki, Evelyn Wever-Croes a bini dilanti como Prome Ministro. Cu respet DIARIO tabata tuma con e tabata presenta su mes na Pueblo sin crea ilusion falso pero solamente mustra cu e tempo di su gobernacion lo no tabata nada facil.

Su prome paso tabata introduci medida pa Aruba por tabata tin placa pa funciona, mientras e tabata atende e maneho financiero nobo, cu mester a habri porta pa futuro di Aruba.

Pa DIARIO, cu a haci investigacionnan special na 2018, a bira importante con Wever-Croes lo a saca Aruba for di fantasia di Citgo cu porfin e tambe por a tuma nota di dje, pasobra gobierno Mike Eman a stroba pa e documento por a wordo trata manera ley ta exigi den Parlamento.

Un forma of otro, tabata tin algo den Prome Ministro Evelyn Wever-Croes cu tabata inspira confiansa. Evelyn Wever-Croes tabata manera un forsa cu tabata pusha hende den un direccion positivo na e momentonan mas pisa.

Aunke e no ta un persona cu ta cana brasa, sunchi, priminti, e tabata inspira pa sigui cana. Pa sigui mira posibilidadnan pa un futuro.

Na momentonan cu hasta den redaccion di DIARIO e pregunta tabata con e lo a soluciona asuntonan, cu cara trankil Prome Ministro Wever-Croes tabata soluciona e situacion.

Menasa di welga, problema cu diferente sectornan tabata yena aire. E forma di actua di Prome Ministro Wever-Croes tabata suavisa e peso di cualkier momento duro y tabata inspira periodista honesto tambe pa sigui cana bay dilanti y pa duna aliento na Pueblo.

Na 2020 mundo a basha abou. Den un rato e gozo di Carnaval na Aruba a bira menasa di morto di un pandemia.

DIARIO tabata confronta trahadonan di hotel cu a realisa con peligroso nan trabou ta pero na mes momento tabata tin miedo cu nan lo keda sin pan pa futuro.

Den e tempo aki tambe Prome Ministro Wever-Croes tabata inspiracion y tabata duna siguransa cu Aruba lo bandona problema y drenta un futuro nobo.

Mientras Aruba tabata den ansia di morto pa loke e pandemia tabata produci, Prome Ministro Wever-Croes tabata actua. Su Gobierno a tuma medidanan pa empresanan keda habri y mantene hende na trabou. Asistencia financiero a wordo duna pa hende sin entrada. Prome Ministro Wever-Croes a bati na porta di Hulanda.

Ora e tabata na punto pa subi avion pa atende cu Hulanda, su palabranan tabata “Den Nomber di Dios”.

El a bolbe cu un acuerdo cu Hulanda cu a yuda Aruba habri caminda pa futuro. No a tarda pa el a presenta dos compania internacional, cu segun tur indicacion, despues di eleccion lo establece na Aruba.

Fondo Monetario Internacional a reconoce e bon gobernacion di Gobierno Wever-Croes y rapportnan oficial ta mustra cu Aruba ya den ta recuperacion economico mientras e maneho dirigi di Gobierno Wever-Croes a kibra forsa di e Pandemia Covid-19.

Awe no ta un Pueblo den desesperacion manera situacion kier a crea ta den porta di eleccion, pero un Pueblo cu a wordo dirigi y inspira dor di su lider, Evelyn Wever-Croes pa den Nomber di Dios sigui cana.

Cu confiansa nos ta tene na man di Evelyn Wever-Croes, un lider cu a cende luz ora luz a paga den e momentonan mas dificil cu historia moderno di Aruba a conoce!