ORANJESTAD (AAN): E noticia tristo a drenta riba Diahuebs, cu e comerciante local Harry Janssen a fayece. Ademas di a dirigi Sport Caribe, el a sa di ta pionero den hopi evento deportivo y atletico na Aruba.
Na comienzo, Sport Caribe tabata yama “Sportshop Antillana’ den Schelpstraat na Playa, y semper tabata promove deporte cerca ciudadanonan. Ademas el a bira representante tambe di e marca deportivo di Adidas.
Sport Caribe awor ta den Emmastraat na Playa, y keto bay ta promove tur deporte. Nan ta existi ya pa mas di 50 aña.
Ademas di maneha e empresa, Harry Janssen pa hopi tempo tabata presidente di Arubaanse Atletiek Bond. Sin duda alguno, Harry a guia varios atleta di Aruba pa nan sobresali. Aki por corda riba su yiu Miguel Janssen, tambe Richard Rodriguez, y tambe Evelyn D. Farrell, y mucho mas.
Algo cu ningun hende ta lubida, ta e hecho cu Harry Janssen ta esun cu a empuha y crea e famoso careda di 10 Kilometer, esta Aruba International Boulevard Loop.
Mañan Diasabra mes, esta 26 di Juni pa 4’or di atardi ta duna start oficial na e di 58 edicion di Harry Janssen National Championship, organisa pa Aruba Athletic Federation. E evento lo tuma lugar na Compleho Deportivo Guillermo Trinidad caminda lo desplega diferente disciplina di “Track and Field”. Tambe tin “Throwing Events” na Centro Deportivo Betico Croes. Diadomingo cuminsando pa 4’or di atardi lo continua cu e diferente disciplinanan y cu ta conta cu mas di 80 atleta.
DIARIO a compronde cu ultimo lunanan, Harry tabata sufri di un quebrante di salud y no tabata mucho den publico mas. Riba Diahuebs el a bay sosega.
Harry Janssen a nace dia 14 di Maart 1935 na Oosterbeek, Hulanda, y tin 86 aña di edad. Na su famia, staf di Sport Caribe, y conocirnan, DIARIO ta extende su mas profundo palabra di condolencia.
