Ministro di Asuntonan Financiero y Economia a logra cu un estilo propio - *Si no ta pa pandemia Aruba lo tabata tin su prome cifranan den balansa na 2020 - *Incertidumbre peligroso di 2017 a bolter den pronosticonan despues di pandemia
ORANJESTAD(AAN)—Kico e Ministro di Asuntonan Financiero y Economia lo haci den e situacion aki?
Esaki ta e pregunta principal cu nos mester a haci nos mes, ora Aruba mester a cera porta di su economia basa riba turismo na momento cu ya e pais tabata den un crisis financiero.
Awe cu Aruba ta bay urna electoral, e Ministro cu mester a atende cu placa y economia cu Covid-19 a ataca na forma frontal, ta presenta cu un sonrisa grandi y un cara alegre cu ta contagia tur hende.
Pa nos su actuacion a bira un reto pa mira kico el a haci realmente.
Na 2020 ya el a entrega e prome presupuesto cu cifranan balansa na Presidente di Parlamento pero Covid-19 a ataca.
International Monetary Fund ta splica con Gobierno Wever-Croes a enfrenta e situacion na e forma cu a haci cu economia local por a sigui lora a base di medidanan cu a wordo introduci.
Empresanan a haya asistencia pa mantene trahadonan na trabou. Alivio fiscal a wordo brinda na empresanan mediano y chikito. Den e Master Plan di Gobierno Wever-Croes ta topa cu e puntonan basico necesario pa atrae inversionista y amplia economia pa asina tin resultado financiero.
Ora lesa rapportnan di Reino, rapportnan di Banco Central y tur instancia cu ta indica con nos economia y situacion financiero ta na e momentonan mas dificil den historia di Aruba, ta topa cu optimismo enorme.
Ora nos analisa e forma cu nos tabata mira Juni 2021 na 2020, nos mester admiti cu nos tabata tin reserva riba e pronosticonan di recuperacion cu a wordo presenta pa turismo y base economico di Aruba.
Aruba lo logra recuperacion, nos a sigui analisa cu cada cifra cu a cay den nos man mientras supervision Hulandes y Reino mes mester a admiti cu e Ministro di Financia tabata cumpli cu reglanan.
Na diferente ocasion nos a mustra cu na 2017 mundo tabata tin duda riba futuro y tur rapport tabata termina cu e pregunta si Citgo ta bini.
Despues di un pandemia, hunto cu Prome Ministro Wever-Croes, e Ministro di Financia ta sostene su mes riba cifranan concreto di produccion actual di turismo y economia.
Sinceramente na Juni 2020, nos no por a kere cu awe nos ta pidi Pueblo bay vota cu e base cu rapportnan oficial local y internacional ta entrega nos.
Rapportnan cu ta papia di un maneho historico den gobernacion, den cual e elementonan economico y financiero sigur ta marca e realidad di Aruba.
Ta cu cifranan concreto den nos man, teniendo cuenta cu e riesgo di Covid-19 tambe a wordo atende, nos por comparti despues di un analisis profundo e sonrisa di e Ministro di Asuntonan Financiero y Economia enfrente futuro di Aruba.
