Muchanan ta sigui mira e importancia di cuida naturalesa 

Conociendo mas di Santo Largo...

ORANJESTAD (AAN): A keda demostra caba, cu ora bo keda siña muchanan for di chikito pa nan respeta naturalesa, bo ta pone nan di eynan caba cuminza cu un costumber di bida largo pa cuida planeta tera.  Experiencianan di trempan cu muchanan canando den mondi y naturalesa, ta yuda muchanan forma un lazo emocional cu matanan, animalnan, y espacionan berde.  E conexion aki ta yuda nan aprecia y ricibi un sentido grandi di responsabilidad ora cu nan ta sigui crece.

   Pesey mes, recien e Park Rangernan di Aruba Conservation Foundation, cooperando cu ‘Buki di Pret Aruba’, a bay duna un grupo di mucha un mainta fenomenal pa explora e area di Santo Largo.

   Pues e Detectivenan di costa tabata den accion un biaha mas.  Nan a cana y ricibi informacion di e ecosistema di costa, y a mira tur esey cu nan propio wowo.  Cu cada pregunta, observacion y descubrimento, nan ta siña cu proteccion di naturaleza ta cuminsa cu comprendiendo e miho.

   Tur cos ta mustra cu e vakantie aki tabata uno hopi productivo pa nos futuro generacion.