Maria Kock-Loefstok di Centro Pastoral:
ORANJESTAD (AAN)-- Señora Maria Kock-Loefstok, den entrevista cu DIARIO a duna un relato, tocante e relevancia cu Centro Pastoral Aruba tin, pa comunidad.
El a señala cu Centro Pastoral Aruba, durante hopi aña a sirbi como espacio de encuentro, capacitacion, liderazgo, retironan, formacion di hoben y actividadnan comunitario.
“Centro ta consisti di diferente parti, manera e aula di encuentronan, e kapel, y cambernan. A logra renovacion den varios parti, entre otro e kapel cu bentana nobo, e parti di coro, altar, y tambe algun camber ariba a haya airco, y haya cosnan nobo.
Centro, pa hopi hende di nos comunidad, ta un lugar cu hopi bunita recuerdonan di formacion y crecemento di un miho bida pa hopi persona, pareha y famia. Pa Centro sigui ta un Centro aworaki nos kier concentra riba e renovacion di e aula. Pa por renova ta costa hopi, y cu esfuerzo y hopi sacrificio a logra varios fase caba pero nos mester sigui traha pa e Centro no bay perdi”, señora Maria Kock-Loefstok a señala.
El a comenta cu e edificio tin hopi aña caba y mester di atencion. Tin partinan di dje cu a bay mas atras cu otronan, y den esey nan ta concentra.
Maria Kock-Loefstok a menciona tambe cu tin hopi hende di nos comunidad ta haci uso di e Centro aki, cursonan, entre otro; y tambe e hobennan. Tin preparacion di Matrimonio, Confirmacion di adulto, hopi curso di Scol di Evangelizacion pa yuda hendenan den nan bida spiritual, tambe Seminarionan ta tuma lugar, tanto pa hoben como pa adulto, y otro gruponan tambe ta haci uso di dje. Prome tabata tin encuentro conyugal cu aworaki ta preparacion di matrimonio.
“E no ta un centro pa actividadnan festivo, e ta pa eventonan spiritual, y e meta ta pa keda mantene e edificio en su estado funcional. Mi mes tin hopi bunita recuerdonan di tempo di e pastornan Hulandes. Nos capel tambe a keda masha bunita, nos kier invita e comunidad pa nan bin. E kapel no ta grandi pero tur Diadomingo, nos tin Pastor Wancho cu ta haci Santo Sacrificio di Misa den nos Kapel”, señora Maria Kock-Loefstok a conclui.
