Ministro Arends mustrando cu e futuro di Adultonan Mayor ta awor

ORANJESTAD (AAN): "Cu Asuntonan di Adulto Mayor, nos lo zorg pa segura e welzijn, y e zorg", Minister Ursell Arends a menciona den un encuentro Dialuna ultimo, caminda miembronan di "Movimento Ta Bida", 

y minister di asuntonan di adulto mayor, Sr. Ursell Arends, a enfoca riba e necesidad urgente pa drecha e bienestar di e grupo di personanan aki.

   "Boso futuro ta awo", ta kico Sr. Arends ta opina over di e situacion, mirando cu no tin tempo pa warda, mirando cu tin un grupo grandi di adulto mayor cu ta den necesidad pa ayudo actualmente.

   Danki na organizacion di Movimento ta Bida pa e bunita iniciativa cu a yuda inspira gobierno pa decreta henter luna di October como luna di adulto mayor. "Cada un di e adultonan mayor a traha duro pa nos como hobennan por hereda e Aruba di awe, e ta nos deber pa garantisa cu nos adultonan mayor por tin un bon calidad di bida".

   Tin reto en berdad. Dr. Falconi a indica cu conforme  cifra  di  e ultimo Censo ta trece hopi  preocupacion. Un ehempel ta con 18.5% di e grupo di adulto mayor no por paga  tur nan gastonan mensual. Esaki tin un efecto negativo riba e calidad di bida di nos adultonan mayor.

   Tambe por nota con un tercera parti di tur cliente di fisioterapista ta adulto mayor, y 11% di e grupo aki tin problema di mobilidad. E ta solamente indica mas ainda cu nos mester duna atencion debido na e grupo vunerabel aki, no solamente den cuido pero tambe den otro aspectonan manera transporte publico.

   Nos mester segura cu e grupo di adulto mayor por keda mas activo posibel pa mas largo posibel, pa nan por participa na sector laboral y na nos economia, y mas importante ainda cu nan por comparti nan conocemento y experiencia na e ‘young professionals’ di  awendia y fungi como mentors pa e futuro generacion - un "Win-win Situation" pa tur generacion.

   "E bienestar di adultonan mayor ta un prioridad pa nos ministerio", segun minister Ursell Arends. Hopi a cuestiona e motibo pakico a cuminsa cu un ministerio, sin fondo sin nada. "Esey por ta berdad, pero awo nos a sa di aloca fondonan den e budget di 2022 pa atende cu cada un di e temanan di prioridad cu ya caba nos a identifica.” Nos no tin hopi pa cuminsa cu’ne, pero por lo menos nos ta cuminsa. Tin un prome paso. Esey riba su mes ta un paso den e bon direccion.

   "Nos no ta bin pa impone un plan, pero pa traha hunto cu e organizacionnan cu ta den e veld pa trece cambio nan structural cu lo beneficia e bienestar general di nos adultonan mayor", Ursell Arends a finalisa bisando.