A anuncia e lanzamento di e proyecto “Les-a-Thon” 2021

Den cuadro di Luna Internacional di Derecho di Mucha y Dia Nacional di Mucha:

ORANJESTAD (AAN) – Diamars atardi a tuma lugar un conferencia di prensa na Eagle Beach, net dilanti di e mata di Fototi, den cual Vanessa Croes, Presidente di Stichting Kids Creation Center, a hiba palabra, anunciando e proyecto “Les-a-Thon”.

Un grupo di mucha di e seccion Traimerdia Scol Amplio Nos Cosecha, tabata presente, hunto cu e directiva di e Stichting, su lider y boluntarionan.

Vanessa Croes a yama e muchanan bon bini, y na tur presente, na e momento cu el a presenta un proyecto nobo y innovativo, pa pueblo di Aruba. Esaki ta e proyecto Les-a-Thon.

Vanessa Croes a informa, oficialmente, cual ta e puntonan importante di e proyecto aki, cu ta inicia dia 1 di November proximo.

Les-a-Thon ta e marathon di Aruba, cu ta consisti di 30 dia di lesamento, for di 1 te 30 di November 2021, unda cu tur nos muchanan ta invita pa lesa tur dia 15 minuut.

“E no ta solamente lesa, pero lesa cu alegria y tin un pakete pa tur mayor y mucha cu registra, pasobra e Les-a-Thon aki ta uno di ambiente. Pues nos tin un lista di aventura cu bo lo ricibi na momento cu bo registra na nos pagina di facebook di Scol Amplio Nos Cosecha”, Vanessa Croes a splica.

Den e lista cu tin den e pakete ta bisa cu e mucha por lesa na lama, como tambe riba cama, y asina tin hopi mas idea pa e mucha lesa y pasa bon.

Vanessa a expresa cu e muchanan ta cla pe, Aruba ta cla pe, hunto cu Biblioteca Nacional, Scol Amplio Nos Cosecha, y Asociacion di Trabao pa Hubentud Aruba (ATHA). “Nos ta cla pa presenta Les-a-Thon 2021. Esaki ta su prome edicion, pues para cla, prepara, pa bo tambe forma parti di dje”, Vanessa a enfatiza.

El a agrega cu pa tur mucha y famia cu registra ta bay tin premio na final. Pues, lesa y desaroya y na final gana premio pa henter famia. E proyecto aki ta pa celebra e Luna Internacional di Derecho di Mucha y e Dia Nacional di Mucha, cu ta wordo conmemora dia 20 di November, y Siman di Buki y Lesamento, asina poniendo enfoke riba e Tratado # 17, cu ta stipula y recorda tur hende cu muchanan tin derecho riba informacion, pa medio di lesamento.