Hasta comunicacion familiar ta bira dificil y causa isolacion --- Dificil pa atende cu recibonan importante riba un telefon --- Covid-19 a wordo uza pa introduci cambio tecnologico acelera
ORANJESTAD(AAN)- “E generacion nobo mester haya atencion. Pero e atencion aki no por bira motibo pa e grupo di grandinan wordo perhudica na un forma sumamente serio.”
Esaki ta informacion cu ta alcansa DIARIO mas y mas y motibo cu DIARIO a start un investigacion entorno e realidad cu un cantidad importante di ciudadano ta confronta.
E informenan cu a drenta DIARIO, tin relacion directo cu publicacionnan di DIARIO cu ta relata con Covid-19 ta wordo uza pa introduci cambio tecnologico na forma acelera. Cambionan, cu manera ta wordo splica na DIARIO, ta causa problema serio pa hopi hende y sigur e grupo cu tin un cierto grado di berguensa pa admiti cu nan no por sigui e desaroyonan cu ta presenta.
Prome cu e Coronavirus nobo a bati na porta, ya DIARIO tabata mustra con tecnologia tabata avansa y tabata introduci cambio di costumbernan di comunidad cu mester a cuminsa prepara su mes.
E pandemia cu a ataca mundo na 2020, a afecta e relacion personal entre hende na un forma significante.
Den e temporada aki oportunidadnan cu tabata haci contacto personal necesario, a wordo reemplasa pa sistemanan den cual internet a bira e forma di comunicacion.
Investigacionnan cu DIARIO a realisa riba e particularidad aki, ta mustra cu no ta solamente Aruba pero tur comunidad na mundo ta enfrenta problemanan humano cu cambionan acelera a trece.
Cambionan cu ta haci uzo di sistemanan cu ta hopi popular cerca hobennan pero cu ta sumamente dificil sigur pa grandinan cu ta wordo confronta cu menasa serio den nan intento di hiba un bida independiente pa un tempo mas largo posibel.
E prome problema cu tin actualmente ta, cu no ta tene na consideracion e problemanan fisico di grandinan pa uza telefon pa nan comunica.
Esaki ta haci cu hopi grandi, mescos cu personanan cu un of otro dificultad of personanan cu no tin placa pa cumpra un telefon costoso pa cada persona den cas, tin problema pa comunica cu otro.
Comunicacion awor pa un gran parti ta via medionan social cu no ta costa placa y a deshaci di e telefon di cas cu ta mas facil pa atende.
Serio ta e hecho, cu companianan awor ta manda recibonan via internet loke ta haci cu grandinan y un gran cantidad di persona, tin problema pa haya nan recibonan cu tabata drenta pa medio di post.
Tin diferente motibo cu ta wordo duna manera e hecho cu kier evita uzo di papel, cu ta afecta selvanan. Mientrastanto loke ta pasa ta afecta grandinan cu no por lesa nan recibo, mester pidi hende pa imprimi copia di tur loke ta drenta via nan telefon, pasobra hopi hende no tin computer of laptop.
Instancianan oficial awor no ta manda post, pero ta informa publico completamente via internet, loke ta haci cu cantidad di persona tin problema pa lesa loke ta drenta den coreo electronico, email.
E situacion ta sumamente serio. Yiunan no kier gasta placa mas na telefon di cas pa yama nan mayornan, cu ta isola pasobra nan bista of nan mannan cu ta tembla, no ta permiti nan atende cu e telefonnan chikito.
Den hopi caso, personanan cu ta bende productonan of artefactonan, ta pidi pa “download”, baha informacion for di computer cu hopi hende mester baha for di un telefon.
Tin aparatonan cu por dirigi pa medio di sistema digital, cu ta favorece un grupo pero ta causa isolacion y ta afecta e ser humano.
DIARIO a investiga situacionnan social cu ta presenta cerca diferente grupo di comunidad cu no ta haya atencion debido di hasta instancianan oficial, instancianan cu ta atende cu asuntonan financiero importante y hasta instancianan cu mester ta alcansabel pa bienestar di hende.
DIARIO lo sigui amplia riba e problema serio cu a surgi y cu ta duna tur indicacion cu e lo bira mas serio, debi na e forma cu e ta afecta sigur grandinan, pero tambe ta trece competencia y diferencia grandi den calidad di bida a base di e dominio di sistemanan digital, cu ta crea problemanan serio den comunidad.
