Minister di Finanzas a mustra cu Gobierno mester di 1.305 miyon Florin

Gastonan di personal lo subi cu 8 miyon: 

ORANJESTAD (AAN) – Dialuna mainta durante conferencia di prensa di Gobierno, Minister di Finanzas Xiomara Maduro, a hiba palabra y a duna un bista encuanto e finanzanan publico di Pais Aruba, y tambe a duna detaye di locual ta e Presupuesto 2022.

   Minister Xiomara Maduro a cuminza pa duna un bista di e cifranan cardinal di e presupuesto di Pais Aruba, y tambe e cambionan cu a resalta, den comparacion cu aña 2021. Ademas, el a duna un splicacion encuanto e necesidad financiero pa cu e aña aki, e conseho di CAft riba e presupuesto, y e contesta di Gobierno tocante esaki.

 CIFRANAN CARDINAL: Aki e mandatario a indica cu Pais Aruba lo conta cu un entrada premira di 1.275 miyon Florin, y pa gasto esaki lo ta 1.566 miyon Florin.

Den esaki pa loke ta gasto di personal ta premira na 438 miyon; servicio y producto: 226 miyon florin, interes lo paga 266 miyon florin, pa subsidio 212 miyon florin, impuesto indirecto, gobierno lo haya 481 miyon, impuesto indirecto 551 miyon florin, pa inversion tin poni 37 miyon, y pa fianza di estudio 26 miyon.

E necesidad financiero pa e aña aki, lo core den 1.305 miyon florin. E deficit financiero pa e aña aki ta di 291 miyon florin, cual ta 5.2% di GDP.

   CAMBIONAN: E dignatario a splica cu den e cambionan cu ta resalta compara cu presupuesto 2021, ta cu gastonan di personal ta subi cu 8 miyon florin, debi cu gobierno a premira pa por paga bek e 50% di e recorte di 12.6% y pa haci esaki, e suma di gastonan di personal ta aumenta cu 8 miyon florin.

   Pa producto y servicio, e suma ta subi  e aña aki cu 26 miyon florin, y esaki ta debi na un escogencia di maneho, entre otro, pa introduci un “Family Justice Center”, lanta un “Bureau Cannabis”, y tambe un “Bureau Innovatie”, y ademas, pa cubri gastonan di e proyecto PPP, cu tur aña ta aumenta.

Encuanto gastonan di interes, tambe ta premira cu lo subi cu 8 miyon, y esaki ta pa motibo tin un suma di 1.014 miyon florin, cu mester wordo financia e aña aki.

            Pa locual ta subsidio esaki tambe ta subi cu 10 miyon florin, y esaki tambe ta debi na e pago di 50% di locual ta e 12.6%, cu gobierno ta premira pa por haci den e transcurso di e aña aki.

            Minister Maduro a splica tambe cu e impuesto indirecto ta subi cu 64 miyon florin, y esaki ta e efecto di ora haci e pago bek di e 50% di e recorte di 12.6%, pues gobierno ta haya e loonbelasting den e caso aki cu ta premira pa por drenta, y tambe e hecho cu a cancela e sosten financiero. Gobierno, aña pasa, a brinda sosten financiero pa e parti di comercio, pero esaki a stop y esaki ta indica cu lo conoce un subida den impuesto directo.

            Pa loke impuesto indirecto, esaki tambe ta subi cu 42 miyon florin, y e ta debi na e mehoramento economico di nos pais, e mandatario a expresa.