ORANJESTAD (AAN): Dialuna mainta, señora Alexandra van Huffelen (di Partido D’66) a huramenta como Secretario di Estado di Asuntonan di Reino.
Prome Minister Evelyn Wever-Croes, den e prome reunion virtual cu señora van Huffelen, den nomber di Gobierno di Aruba, a expresa palabranan di felicitacion na e Secretario di Reino pa e siguiente periodo.
“Mi a bisa señora van Huffelen cu mi ta spera cu nos por tin un bon relacion cu otro den cual nos ta tuma cuenta cu e vision y e balornan cu nos tin en conhunto pa hunto nos por desaroya oportunidadnan nobo den Reino y pa asina pronto Aruba por ta back para riba su propio forsa”, Prome Minister a duna di conoce.
Señora van Huffelen a mustra hopi interes pa sa con ta bayendo na Aruba en general. Prome Minister a informa señora van Huffelen di con e recuperacion economico di nos pais ta bayendo y cu danki na Hulanda nos por a enfrenta e momentonan mas dificil.
Tambe señora van Huffelen a puntra con ta para cu Covid. Prome Minister a inform’e di e cifranan cu actualmente ta hopi halto door di Omicron dunando di conoce tambe cu te ainda por maneha e situacion pasobra nos capacidad den hospital ta bou control. Tambe Aruba ta manehando e hecho cu Merca a pone nos den e categoria cu mas riesgo. Apesar di ta mira cancelacionnan, asina mes turistanan ta sigui bin y esaki ta un bon señal.
Den transcurso di dia, Prome Minister a manda un carta mas elabora pa señora van Huffelen pa duna infomacion tocante Aruba y e puntonan cu ainda tin nos dividi cu e Ministerio di Asuntonan di Reino. Di su banda, Secretario di Estado pa Asuntonan di Reino a expresa cu pronto lo ta back na mesa pa cuminsa negocia riba e tres puntonan cu a keda habri riba 17 di december den e ultimo Conseho di Ministronan di Reino.
E prome di e tres puntonan aki, Prome Minister a duna di conoce, ta e echo cu Hulanda a pone como condicion pa nos haya sosten di likides pa e kwartaal aki, un protocol cu nan kier a pone sin fecha. Despues sinembargo, Hulanda mes a cambia nan posicion y bisa cu nan ta dispuesto na papia di un fecha. E di dos punto ta e nota di cambio di Consensus Rijkswet di COHO. Y e di tres punto ta e echo cu Hulanda no kier pa nos stop e recorte di salario di 12.6% di empleadonan publico y semi-publico.
“E tabata un bon reunion cu señora van Huffelen kende ta un persona cu tin hopi interes pa Aruba y pa e paisnan den Reino. Mi tin tur confianza cu e ta bay ta un periodo interesante den cual nos ta bay logra cosnan grandi pa Aruba”, Prome Minister a duna di conoce.
