Meredith Faarup-Lacle di FAVI:
*Mucha cu limitacion visual ta aumentando cada aña
ORANJESTAD (AAN) Meredith Faarup-Lacle, Ambulante Onderwijskundige Begeleider, na Fundacion Arubiano pa esnan Visualmente Incapacita (FAVI), a duna di conoce den entrevista cu DIARIO, cu un mercadeo (campaña) ta tumando lugar di parti di bestuur di SKOA, en conexion cu inclusion di muchanan cu limitacion di bista, specificamente.
Meredith a menciona cu FAVI tin dos maestro na disposicion pa reforza e departamento di educacion, mirando cu e cantidad di muchanan cu limitacion di bista ta aumenta cada aña, y pa e motibo aki e muchanan aki ta forma parti d FAVI su Enseñanza, pero hopi biaha nan no por acomoda nan na scol, of nan no ta accesible pasobra e letternan di buki ta hopi chikito.
Anto e ora ey e rol di FAVI ta bin unda cu nan ta informa mayor y scol tambe, con nan por inclui e mucha aki, integr’e na scol, sin cu e wordo perhudica den su desaroyo na scol. “Pasobra e parti di educacion ta hopi importante pa e mucha, ora FAVI ta bay scol, ta duna informacion, ta couch e docente y e mucha mes tambe, con e por anda cu su limitacion, p’asina e por funciona optimalmente den klas”, Meredith a splica.
“Nos ta percura pa adaptacion di su bukinan, si buki ta chikito e letternan mas grandi, of nos ta bin cu algun medio auxiliar, cu por facilita aumento, pero en todo caso tin muchanan tambe cu ta forma parti di nos enseñanza cu ta ciego. Anto FAVI ta percura tambe pa forma e mucha aki, unda e no ta lesa cu su wowo sino ta lesa cu su dede, cu e metodo di Braille, y FAVI ta percura pa dune tur e guia y lesnan necesario pa e por domina tur e habilidadnan aki y nos ta percura pa tur su metodonan tambe ta di Braille cu contenido, igual cu su resto di klas”, señora Faarup-Lacle a indica.
FAVI ta guia e muchanan for di 0 te 18 aña di edad. Pero si e persona tin 25 aña y ainda ta den educacion, FAVI ta sigui guie y sosten’e. “Pero e parti di e area di enseñanza obligatorio ta cuminza na su 4 aña di edad caba te su 16 aña, y eynan nos ta sostene cualkier scol bestuur, e por ta SKOA, DPS, e por ta scolnan priva. Tur di nan cu tin mucha di nos registra nos ta brinda e servicio unda nos ta duna e guia y sosten pa e mucha por ta accesible na scol”, Meredith Faarup-Lacle a señala.
