Alumnonan a paga 5 Florin pa purba tira crema den cara di Ministro

Exitoso ‘Face Smash’ na Mon Plaisir School

ORANJESTAD (AAN): Relaciona  cu Dia di Rey, Minister Endy Croes y su esposa, a atende e “Koningsnacht” organiza pa Mon Plaisir Basisschool.  Aki a celebra cumpleaño Rey Willem-Alexander. Un atardi ameno unda cu tabata reina un tremendo ambiente, tabatin un bunita show di baile, canto, benta di articulo pa e alumnonan di e scol y benta di cuminda.

   Ademas di esaki, tabatin un bunita show di autonan di antaño. Minister Endy Croes a participa den e wega pa recauda fondo, esta “face smash”, unda cu e alumnonan a cumpra un tayo yena cu slagroom pa 5 Florin y tira esaki riba e mandatario di Enseñansa y Deporte. Sigur e tabata un atraccion hopi special y e alumnonan a gosa di dje.

   “Cu hopi amor mi a participa pa brinda alegria den curason di e muchanan”, Minister Endy Croes a indica. E mandatario a ricibi basta slagroom, pero sigur e tabata pa un bon causa. Pa conclui, Minister Endy Croes ta gradici pa e invitacion y caluroso recepcion. Alavez e mandatario ta felicita cabesante di scol Señora Debby Arends-Gietel, alumno- y maestronan cu e bunita y exitoso evento.