Causa basta daño riba e grid di coriente
ORANJESTAD (AAN): Un situacion di urgencia a presenta su mes Diaranson merdia den area di Santa Cruz y Piedra Plat, ora cu diripiente habitantenan a tende un sonido fuerte similar cu explosion, y mesun momento coriente a bay.
A resulta cu na un palo di luz caminda tin transformer, hendenan a mira un arco di plasma di voltahe halto riba e palo di luz y mesora coriente a bay. Coriente a bay na Santa Cruz, Sero Pita, Tamarijn, Piedra Plat, y vecindario.
Personal di NV Elmar a acudi pa 1:30 pm na e lugar pa mira kico ta pasando, y pa nan sorpresa ora di yega a nota cu tur fuse di voltahe halto a trip. Y na e palo di luz, na halto mey-mey di e wayanan di coriente, y pega na e pida mas riba di e palo di luz, a bin descubri blaas di material Mylar, cu posiblemente tabata yena cu gas helium.
Y e arco tabata asina cayente, cu el a hasta kibra un di e wayanan di voltahe halto.
Un hende adulto of mucha pa ekibocacion a laga e blaas bay for di un di e casnan ey pariba. E blaas mylar aki ta manera color roos of color di pink salmon.
E blaas di material Mylar ta fabrica di foil, y ora cu nan mishi cu wayanan di coriente, esaki ta ocasiona un corto circuito y ocasiona blackout. E ta daña ekiponan tambe di compania di electricidad.
Personal di NV Elmar pa banda di 2:30 pm a start na isola e problema eynan, pa asina nan por a duna e barionan mas leu coriente bek. Finalmente mester a usa truck pa subi bay na halto, y los loke a resta di e blaas for di e wayanan di coriente. Despues a rek waya nobo entre palonan di luz, pa reemplaza esun cu a kibra y cay.
Pues un hende den e area a laga e blaas aki bay halto, y causa molester pa un area basta extenso di Santa Cruz y Piedra Plat.
Porfin despues di a kita tur esaki, te banda di 3:07 pm, ta tur hende a haya coriente bek.
Den apenas 2 siman: Loke a socede Diaranson merdia, a bira e di dos biaha den menos di 2 siman cu algo similar ta socede. Ultimo biaha tabata Diadomingo 14 di April 2024, cu un Mylar blaas yena cu Helium a dal den un palo di luz na Tanki Leendert, y causa blackout anochi.
Den pasado tabatin caso similar cu a socede na Tanki Leendert (banda di Rococo Plaza bay pabao), y tambe uno riba highway di Piedra Plat.
Ultimo tempo hopi hende ta cumprando e blaasnan tipo Mylar aki (e ta blink metalico asina), pa celebracion. Tene cuidao cu nan no ta bula bay y bay pega den wayanan di coriente.
