ImSan a habri un espacio chikito paden pa duna esnan di edad grandi mas comodidad pa haya vacuna

ORANJESTAD (AAN): Diamars mainta durante un conferencia di prensa teni net pafo di e Mobile Unit unda cu ta vacuna pueblo di Pariba di Brug pafo di Centro Medico Dr. Rudi Engelbrecht na San Nicolas, Dr. Joel Raijnherc kende ta director di ImSan a hiba palabra tambe.

   El a admiti cu e campaña di Operation Mobile Unit no ta uno cu nan a bin cune, sinembargo nan sa di e importancia pa vacuna lo mas hopi hende posible na Aruba.

    Ora cu riba Diamars mainta ImSan a mira cuanto hende di edad kier haya nan vacuna y cu tin di warda bao di e tent den solo haya nan turno, e Director a core crea un espacio paden di nan edificio, unda den tur comodidad esnan di edad grandi por bay sinta y haya nan vacuna paden.

   Esaki sigur ta un bunita gesto cu ImSan a core haci adhoc riba Diamars mainta.  E ta un muestra cuanto hende di Pariba di brug tabata wardando riba e posibilidad pa haya e vacuna mas cerca di cas.

   Dr. Raijnherc a gradici Gobierno, DVG, Bureau Rampen Bestrijding Aruba, pa tur e esfuerzo cu nan ta haciendo pa vacuna lo mas hopi hende posible na Aruba.  Un vacuna cu ta yudabo evita di bira hopi malo si acaso bo wordo contagia cu Coronavirus, y evita cu Hospital ta bira demasiado sobrecarga y cu no por duna cuido.  Corda cu trahadornan di salud tambe ta wordo contagia, y esey ta reduci e cantidad di profesional cu por duna servicio tambe den centronan di salud.

   “Nos mester busca manera pa echt bay guera contra e Virus aki y no tin miedo pa tuma e vacuna,” Dr. Raijnherc a bisa.

   Dr. Raijnherc a bisa cu e ta hopi orguyoso pa e bon colaboracion entre e gruponan trahando na ImSan, principalmente e grupo di BRA Aruba, e grupo di DVG, y empleadonan di ImSan, y tambe a gradici inmensamente Dr. Monica Nuboer di ImSan kende a haci esfuerzo pa prepara e organizacion di e proceso di vacunacion cu a cuminza Diamars.