Dia 17 di Januari ta ultimo dia pa entrega nominado pa boluntario di aña VOTY award 2021

CEDE Aruba ta recorda

ORANJESTAD (AAN): Dia 5 di Februari 2022 lo tuma lugar e di 5 edicion di ‘Volunteer of the Year’ (VOTY) Award, na unda CEDE Aruba hunto cu NGO’s ta duna reconocimento na boluntarionan riba nos isla.  

Manera nos sa cu mayoria organizacion social, cultural, educativo y deportivo ta depende di boluntario pa yuda den tareanan diario of den eventonan durante aña. Den cuadro di esaki, e pandemia a bira un factor cu a exigi mas esfuerzo y creatividad di boluntarionan pa sigi duna cuido of ayudo na e organisacionnan. E importancia di trabou boluntario ariba nos isla a pone cu CEDE Aruba ta yuda cada organización pa duna atencion na un boluntario special durante e ultimo 5 aña.   

VOTY Award a bira un evento anual na unda mayoria NGO ta bisa danki na un boluntario special cu a haci un esfuerzo y impacto extraordinario ariba e trabou di e organizacion of e ayudo na clientenan. Asina cada organizacion por pone nan voluntario special den e ‘spotlight’, mirando cu e ta un bon ehempel pa otronan. E boluntarionan di aña ta wordo selecta pa e organisacionnan mes. CEDE Aruba ta organiza e evento y ta pone e plataforma disponibel. Asina ta spera cu e evento lo duna atencion pa e importancia di trabou boluntario en general, mirando cu hopi organisacion mester di mas boluntario durante aña. 

VOTY Award lo tuma lugar di 5 di Februari den Cas di Cultura. Desde december 2021 caba ta pidi tur organisacion pa nan manda nan nominado aden. CEDE Aruba kier informa tur organisacion cu e ultimo dia pa entrega e nominado lo ta 17 di Januari 2022. Tur instancia por manda solamente un nominado. Organisacionnan cu ta mas grandi y cu tin mas cu un localidad por manda un boluntario pa cada localidad. E criteria mas importante pa selecciona e nominado ta cu e persona mester a haci un trabou extraordinario pa e organizacion durante aña 2022 y a destaca pa e motibo aki. 

Organisacionnan por manda e nominado via e link cu organisacionnan a ricibi caba hunto cu e invitacion. Tambe por manda e nominado via e siguiente email adres:  Cette adresse e-mail est protégée contre les robots spammeurs. Vous devez activer le JavaScript pour la visualiser..

Por favor manda e nomber y fam completo y corecto, e nomber corecto di e organizacion y e motibo pakico e persona ta wordo nomina, den no mas cu 5 regel. 

CEDE Aruba ta gradici tur voluntario na Aruba cu a yuda un of otro organización y a duna nan tempo valioso durante aña 2021.