Hopi palabra bunita pa felicita IBiSA cu nan 50 aña di existencia

Minister di Deporte, Gerlien Croes:

ORANJESTAD (AAN): Minister di Deporte, Gerlien Croes, durante un conferencia di prensa diaranson merdia, a felicita IBiSA, cu antes tabata IDEFRE, cu e celebracion di 50 aña di existencia,. Minister Croes a splica e historia y desaroyo di e unico organizacion di deporte na Aruba aki, indicando cu el a cuminsa den añanan 70 cu e inspiracion y iniciativa di ex politiconan cu a wak e importancia di deporte den nos comunidad y na scolnan, pa keda move y biba saludabel y tambe e parti recreaccional.

   ex-Ministro Hendrik Croes a cuminisa cu e inciativa pa inicia un departamento pa maneho di deporte na Aruba. Pa e tempo ey, e minister a menciona, tabata un iniciativa hopi grandi pa Aruba.

   Den e trayectoria di e ultimo 50 añanan cu a transcuri, e minister a menciona, e actividadnan aki a keda tambe como e actividadnan primordial. Actividadnan interinsular of escolar a sigui desaroya y na aña 1976 oficialmente a institui un departamento di gobierno specifico di deporte, Idefre. Y na aña 2012, e departamento a bira oficialmente IBiSA cu a sigui e mesun meta y inspiracion, asistiendo tur dia gruponan di tur edad, tur organizacion y scol cu nan actividadnan di movecion y salud. Minister Croes ta gradici tur director y trahado cu pa 50 aña a y ta traha activamente pa deporte y salud pa nos comunidad.

   “Mi ta felicita directiva, trahandonan, tur partner, tur mayor y comunidad en general cu e 50 añanan di un departamento di deporte unico na Aruba. Mi ta spera cu nos por conta cu boso pa hopi aña mas. Danki na boso cu despues di hopi desaroyo den movecion y deporte, nunca a laga los di e meta y inspiracion cu Aruba mester tin movecion den e comunidad y esaki ta loke nos kier sigui garantisa”, Minister Gerlien Croes a expresa.